ថ្លែងនៅក្នុងឱកាសនោះ ឯកឧត្តម ជា វ៉ាន់ដេត បានមានប្រសាសន៍ថាកម្មវិធីពានរង្វាន់ថ្នាក់ជាតិនេះ ធ្វើឡើងក្នុងគោលបំណងជំរុញការធ្វើបរិវត្តន៍កម្មឌីជីថល ក៏ដូចជាចូលរួមក្នុងការលើកកម្ពស់ការប្រើប្រាស់បច្ចេកវិទ្យាឌីជីថល និងនុវានុវត្តន៍ឌីជីថលនៅកម្ពុជា។ ជាក់ស្ដែងកាលពីឆ្នាំ២០២១ កន្លងទៅ ក្រុមហ៊ុន PillTech ដែលបានឈ្នះពានរង្វាន់នេះ បូករួមជាមួយការគាំទ្រនិងជ្រោមជ្រែងពីក្រសួងប្រៃសណីយ៍និងទូរគមនាគមន៍ បានធ្វើឱ្យ PillTech អាចឈានជើងទៅប្រគួតនិងឈ្នះ “ពានរង្វាន់បចេ្ចកវិទ្យាគមនាគមន៍និងពត៌មានអាស៊ាន២០២១” ហើយទទួលបានធនធានល្អបន្ថែមត្រឡប់មកវិញផងដែរ។

នៅក្នុងឱកាសនេះផងដែរ ឯកឧត្តម ជា​ វ៉ាន់ដេត ក៏បានលើកឡើងផងដែរ ផែនការណ៍សំខាន់ៗ របស់ក្រសួងប្រៃសណីយ៍ និងទូរគមនាគមន៍ គឺអនុវត្តស្របតាមគោលនយោបាយរដ្ឋាភិបាលឌីជីថលឆ្នាំ ២០២២-២០៣៥។ ហើយការងារអាទិភាពរបស់ក្រសួង រួមមាន ការបង្កើតឱ្យមានធនធានមនុស្សផ្នែកឌីជីថល ផ្លាស់ប្ដូរសេវាសារធារណៈរបស់រដ្ឋពីបែបចាស់ទៅជាបែបឌីជីថលទំនើប និងពង្រីកបណ្តាញទូរស័ព្ទចល័ត ក៏ដូចជាប្រព័ន្ធអ៊ីនធឺណិតគ្របដណ្ដប់ទូទាំងប្រទេស។

ជាមួយគ្នានេះដែរ បើតាមលោក សុវណ្ណ យ៉ាវ CEO ក្រុមហ៊ុន Huawei ប្រចាំប្រទេសកម្ពុជា ក៏បានលើកឡើងពីសារៈសំខាន់នៃការតភ្ជាប់អ៊ីនធឺណិត ដោយបានលើឡើងពីប្រសាសន៍មួយឃ្លារបស់សម្ដេចតេជោ ដែលបានលើកឡើងថា «មានផ្លូវថ្នល់ មានក្ដីសង្ឃឹម»។ ហើយអ៊ីនធឺណិត គឺជាហេដ្ឋារចនាសម្ព័ន្ធមួយសម្រាប់ប្រទេស ដែលប្រៀបដូចជាផ្លូវថ្នល់ឌីជីថលដូច្នេះដែរ ពោលគឺគេមិនអាចអភិវឌ្ឍន៍ប្រទេសឆ្ពោះទៅកាន់សង្គមឌីជីថលដោយគ្មានអ៊ីនធឺណិតបានោះទេ។

លោក សុវណ្ណ យ៉ាវ បានបន្ដថា ដើម្បីអភិវឌ្ឍន៍ឱ្យអ៊ីនធឺណិតគ្របដណ្ដប់ទូទាំងប្រទេសបាន គឺត្រូវតែមានការពួតដៃសហការគ្នាទាំងវិស័យសាធារណៈ ជាមួយនឹងវិស័យឯកជន។ ហើយក្នុងការងារដ៏សំខាន់មួយនេះផងដែរ ក្រុមហ៊ុន Huawei ផ្ទាល់មានឱកាសសហការជាមួយក្រសួង ធ្វើការទៅលើការតភ្ជាប់អ៊ីនធឺណិតសម្រាប់ប្រជាជនកម្ពុជាទូទាំងប្រទេស និងបានព្យាយាមនាំយកបច្ចេកវិទ្យាចុងក្រោយបំផុតរបស់ពិភពលោកសម្រាប់កម្ពុជាផងដែរ។

លោក សុវណ្ណ យ៉ាវ បានបន្ដទៀតថា ក្រៅពីការចូលរួមជាមួយនឹងរដ្ឋាភិបាលក្នុងការបង្កើតហេដ្ឋារចនាសម្ព័នឌីជីថលសម្រាប់កម្ពុជា ក្រុមហ៊ុន Huawei ក៏មានបេសកកម្មក្នុងការរួមចំណែកជួយសង្គមកម្ពុជា តាមរយៈការឧបត្ថម្ភទៅលើកម្មវិធីច្ចេកវិទ្យាផ្សេងៗជាច្រើន ដូចជាកម្មវិធី Cambodia Digital Awards 2022 ​នេះជាដើម។ បន្ថែមពីនេះទៀត សម្រាប់ការរួមចំណែកអភិវឌ្ឍន៍ធនធានមនុស្សកម្ពុជា  ក្រុមហ៊ុន Huawei បានសហការជាមួយនឹងក្រសួងប្រៃសណី និងទូរគមនាគមន៍ ដោយបានបណ្ដុះបណ្ដាលធនធានកម្ពុជាជាង ១០០០នាក់ តាមរយៈកម្មវិធី «Seed for the Future» ដោយសហការណ៍ជាមួយនឹងសាកលវិទ្យាល័យជាច្រើននៅកម្ពុជា។

លោក សុវណ្ណយ៉ាង បានឱ្យដឹងទៀតថា រយៈពេល៣ឆ្នាំមកនេះ ពួកយើងមានមោទកភាព ដែលបានចូលរួមចំណែកគាំទ្រដល់ធុរកិច្ចបង្កើតថ្មីកម្ពុជា (Startup) ជាង១០០ក្រុមហ៊ុន។ ការជំរុញក្រុមហ៊ុនបច្ចេកវិទ្យា ដែលពោពេញទៅដោយការច្នៃប្រឌិតខ្ពស់ និងនវានវត្តន៍ទាំងអស់នេះ គឺជាកម្លាំងជំរុញមួយដ៏សំខាន់ក្នុងការរួមចំណែកអភិវឌ្ឍន៍សង្គមសេដ្ឋកិច្ចកម្ពុជាឱ្យកាន់តែរីកចម្រើននឹងទំនើបជាងមុន។

CEO ក្រុមហ៊ុនបច្ចេកវិទ្យាយក្ស Huawei រូបនេះ ក៏បានលើកទឹកចិត្តឱ្យសហគ្រិនកម្ពុជាបង្កើតធុរកិច្ចថ្មី (Startup) ឱ្យបានកាន់តែច្រើន និងចូលរួមក្នុងកម្មវិធីប្រគួតប្រជែងផ្សេងៗ ដូចជាកម្មវិធី Cambodia Digital Awards ជាដើម ដើម្បីរួមចំណែកជំរុញការអភិវឌ្ឍន៍ប្រទេសកម្ពុជានៅក្នុងបរិបថសង្គមឌីជីថល។ បន្ថែមពីនេះទៀត លោកលើកទឹកចិត្តឱ្យសហគ្រិនកម្ពុជាហ៊ានស្រមៃ និងហ៊ានគិតធំ ធ្វើធំ ជាក់ស្ដែងកាលពី៣០ឆ្នាំមុន ក្រុមហ៊ុន Huawei គឺជាធុរកិច្ចបង្កើតថ្មី (Startup) ដ៏តូចមួយ ជាមួយនឹងបុគ្គលិកតិចតួចប៉ុណ្ណោះ ប៉ុន្ដែបច្ចុប្បន្ននេះ ក្រុមហ៊ុន Huawei អាចពង្រីកខ្លួនក្លាយជាក្រុមហ៊ុនបច្ចេកវិទ្យាសាកលដ៏ធំមួយ។​ ហើយបើគិតចាប់ពីពេលនេះតទៅ ៣០ឆ្នាំខាងមុខ លោកជឿថា សហគ្រិនខ្មែរក៏អាចមានសមត្ថភាពបង្កើតក្រុមហ៊ុនដែលប្រសើរ និងធំជាង Huawei ហើយឈានមុខគេផ្នែកឌីជីថលក្នុងប្រទេសកម្ពុជា និងពិភពលោក។

គួរជម្រាបផងដែរថា នេះជាឆ្នាំទី២ហើយ ដែលក្រុមហ៊ុនបច្ចេកវិទ្យាយក្ស Huawei Technologies (Cambodia) បានធ្វើការឧបត្ថម្ភទៅលើកម្មវិធី Cambodia Digital Awards។ ដោយឡែក សម្រាប់ក្រុមហ៊ុនទាំង៥​ ដែលទទួលបានពានរង្វាន់ឌីជីថលកម្ពុជាឆ្នាំ២០២២ (Cambodia Digital Awards 2022) រួមមាន៖

• ពានរង្វាន់មាតិកាឌីជីថលល្អបំផុតប្រចាំឆ្នាំ (Best Digital Content of the Year) ត្រូវបានផ្តល់ជូន “ EdTech Video ” របស់ E-School Cambodia
• ពានរង្វាន់ការស្រាវជ្រាវ និងអភិវឌ្ឍន៍ឌីជីថលល្អបំផុតប្រចាំឆ្នាំ (Best Digital R&D of the Year) ត្រូវបានផ្តល់ជូន “ The Khmer Identification Card (ID) OCT API ” របស់មជ្ឈមណ្ឌលធុរកិច្ចថ្មី “ តេជោ ” (Techo Startup Center)
• ពានរង្វាន់ស្ថាប័ននុវានុវត្តន៍ឌីជីថលល្អបំផុតប្រចាំឆ្នាំ (Best Digital Innovation Organization of the Year) ត្រូវបានផ្តល់ជូន “ EZECOM Mobile App ” របស់ក្រុមហ៊ុន EZECOM
• ពានរង្វាន់បច្ចេកវិទ្យានុវានុវត្តន៍សង្គមល្អបំផុតប្រចាំឆ្នាំ (Best Social Innovation Technology of the Year) ត្រូវបានផ្តល់ជូន “ CarnetDia App ” របស់ក្រុមហ៊ុន CarnetDia
• ពានរង្វាន់រដ្ឋមន្ត្រីក្រសួងប្រៃសណីយ៍និងទូរគមនាគមន៍សម្រាប់ធុរកិច្ចថ្មី (Minister of Post and Telecommunication Startup Award) ដែលពានរង្វាន់ពិសេស មានទឹកប្រាក់ ១ម៉ឺនដុល្លារ សម្រាប់គាំទ្រដល់កិច្ចខិតខំប្រឹងប្រែងបង្កើតធុរកិច្ចថ្មីឌីជីថល ការលើកកម្ពស់ផលិតភាព ប្រសិទ្ធភាព និងសមត្ថភាពក្នុងការច្នៃប្រឌិត ក៏ដូចជាគាំទ្រដល់ប្រព័ន្ធអេកូឡូស៊ីបច្ចេកវិទ្យាក្នុងប្រទេស ដែលត្រូវបានផ្តល់ជូន ” CheckinMe App ” របស់ CheckinMe ។

សូមបញ្ជាក់ជូនថា ជ័យលាភីទាំង ៥ នេះ ត្រូវបានជ្រើសរើសក្នុងចំណោមអ្នកដាក់ពាក្យ ១៧២ ស្ថាប័ន ដោយគណៈកម្មការជំនាញ មកពីស្ថាប័នរដ្ឋ ក្រុមហ៊ុនឯកជន សង្គមស៊ីវិល និងគ្រឹះស្ថានសិក្សា ដោយផ្អែកលើលក្ខណៈវិនិច្ឆ័យទាំង ៤ ចំណុចគឺការច្នៃប្រឌិតបច្ចេកវិទ្យា ការដោះស្រាយបញ្ហា ប្រសិទ្ធភាពនៃប្រតិបត្តិការ និងយុទ្ធសាស្ត្រទីផ្សារ៕