កាលពីឆ្នាំ២០២២ កន្លងទៅនេះ ក្រុមហ៊ុន Huawei បានបន្ដពង្រឹងវិនិយោគទៅលើការស្រាវជ្រាវ និងអភិវឌ្ឍន៍បច្ចេកវិទ្យាថ្មីៗ (R&D) ដោយបានចំណាយប្រាក់សរុបជាង ១៦១.៥ពាន់លានយន់ ឬស្មើនឹងប្រមាណ ២៣.៤ពាន់លានដុល្លារ ក្នុងឆ្នាំ២០២២ ខណៈចំនួននេះគឺតំណាងឱ្យទឹកប្រាក់ ២៥.១% នៃចំណូលសរុបប្រចាំឆ្នាំរបស់ក្រុមហ៊ុន​ ដែលបាននាំឱ្យការចំណាយសរុបទៅលើផ្នែកស្រាវជ្រាវនិងអភិវឌ្ឍន៍របស់ក្រុមហ៊ុន Huawei ក្នុងរយៈពេល១០ឆ្នាំចុងក្រោយនេះ បានកើនឡើងរហូតដល់ទៅ ៩៧៧.៣ពាន់លានយន់ ឬស្មើនឹងប្រមាណ១៤២ពាន់លានដុល្លារ។

លោក Eric Xu ដែលជាប្រធានបន្តវេនរបស់ក្រុមហ៊ុន Huawei បានថ្លែងនៅក្នុងសន្និសីទសារព័ត៌មានប្រចាំឆ្នាំរបស់ក្រុមហ៊ុនថា «នៅក្នុងឆ្នាំ ២០២២ បរិយាកាសខាងក្រៅ និងកត្តាសេដ្ឋកិច្ចមិនមែនទីផ្សារ បានធ្វើឱ្យមានផលប៉ះពាល់ដល់ប្រតិបត្តិការរបស់ក្រុមហ៊ុន Huawei ទាំងមូល។ នៅកណ្តាលព្យុះដ៏កំណាចមួយនេះ យើងបានបន្តការប្រណាំងទៅមុខ ដោយធ្វើអ្វីៗគ្រប់យ៉ាងតាមកម្លាំងរបស់យើង ដើម្បីរក្សាបាននូវភាពបន្តដំណើរការអាជីវកម្ម និងបម្រើអតិថិជនរបស់យើង។ យើងក៏បានបន្ដដំណើរយ៉ាងឆ្ងាយក្នុងការដាំដុះប្រមូលផល បង្កើតប្រាក់ចំណូលជាបន្តបន្ទាប់ប្រកបដោយស្ថិរភាព ដើម្បីទ្រទ្រង់ជីវិតរបស់យើង និងបង្កើតនូវមូលដ្ឋានសម្រាប់ការអភិវឌ្ឍន៍នាពេលអនាគត»។

ជាមួយគ្នានេះដែរ​ ក្រុមហ៊ុន Huawei មានជំនឿយ៉ាងមុតមាំថា ការសហការជាមួយដៃគូប្រព័ន្ធអេកូឡូស៊ីរបស់ខ្លួន នឹងជួយឱ្យមានការរីកចម្រើនទាំងអស់គ្នាកាន់តែខ្លាំងឡើង។ ហើយក្រុមហ៊ុន Huawei នៅតែបន្ដធ្វើការដំណើរការផ្លែតហ្វមរបស់ខ្លួនរួមមាន HarmonyOS, Kunpeng, Ascend និង cloud portfolio ជាដើម។ ហើយក្រុមហ៊ុន Huawei កំពុងតែយកចិត្តទុកដាក់ទៅលើការផ្ដល់សេវាកម្ម និងការអភិវឌ្ឍន៍បច្ចេកវិទ្យារបស់ខ្លួនឱ្យកាន់តែទំនើប ដើម្បីគាំទ្រដល់អតិថិជន និងដៃគូប្រព័ន្ធអេកូរបស់ខ្លួនលើគ្រប់វិស័យ។  ដោយបច្ចុប្បន្ននេះ ក្រុមហ៊ុន Huawei បាននឹងកំពុងតែធ្វើការជាមួយអ្នកអភិវឌ្ឍន៍កម្មវិធីបច្ចេកវិទ្យាជាងប្រាំបួនលាននាក់ និងដៃគូប្រព័ន្ធអេកូជាង ៤០,០០០ ដើម្បីជំរុញការច្នៃប្រឌិតដោយផ្អែកលើប្រព័ន្ធអេកូឡូស៊ី និងបង្កើតគុណតម្លៃកាន់តែច្រើនសម្រាប់អតិថិជន។

លោក Eric Xu បានសង្កត់ធ្ងន់ថា «ឆ្នាំ២០២៣ គឺជាឆ្នាំដ៏សំខាន់បំផុតមួយ ក្នុងការអភិវឌ្ឍន៍ និងការរស់រានមានជីវិតប្រកបដោយនិរន្ដភាព របស់ក្រុមហ៊ុន Huawei»។ លោកបន្ដទៀតថា «ផ្កា (Plum) មានទំនោរលូតលាស់យ៉ាងល្អក្នុងរដូវត្រជាក់ខ្លាំង ខណៈវាជាការពិតដែលថាយើងប្រឈមជាមួយនឹងសម្ពាធយ៉ាងច្រើននៅចំពោះមុខយើងមានអ្វីដែលវាត្រូវការដើម្បីចេញមកក្រៅជាមួយនឹងឱកាសជាច្រើនដើម្បីរីកចម្រើន។ យើងមានទំនុកចិត្តលើសមត្ថភាពរបស់យើងក្នុងការជំនះបញ្ហាប្រឈមដែលកើតឡើង ពោលគឺពួកយើងបាននឹងកំពុងតែព្យាយាមក៏សាងនូវមូលដ្ឋានគ្រឹះដ៏រឹងមាំសម្រាប់ការរស់រានមានជីវិត និងការអភិវឌ្ឍន៍ប្រកបដោយចីរភាព»។

គូសបញ្ជាក់ថា របាយការណ៍ហិរញ្ញវត្ថុទាំងអស់នៅក្នុងរបាយការណ៍ប្រចាំឆ្នាំ 2022 ត្រូវបានធ្វើសវនកម្មដោយឯករាជ្យដោយ KPMG ដែលជាក្រុមហ៊ុនគណនេយ្យអន្តរជាតិ Big Four ។ ដើម្បីទាញយករបាយការណ៍ប្រចាំឆ្នាំ 2022 សូមចូលទៅកាន់គេហទំព័រ https://www.huawei.com/en/annual-report/2022