ចាប់តាំងពីឆ្នាំ២០១៨ លោក Elon Musk ត្រូវទទួលភារកិច្ចធ្វើយ៉ាងណាដឹកនាំក្រុមហ៊ុន Tesla ឲ្យមានការរីកចម្រើន ធ្វើយ៉ាងណាឲ្យក្នុងមួយឆ្នាំក្រុមហ៊ុន Tesla ត្រូវកើនតម្លៃក្រុមហ៊ុន ៥០ពាន់លានដុល្លារ។ បន្ថែមពីនេះទៀត លោក Elon Musk ត្រូវធ្វើយ៉ាងណាដឹកនាំឲ្យក្រុមហ៊ុន Tesla ឡើងតម្លៃខ្លួនដល់ ៦៥០ពាន់លានដុល្លារក្នុងទីផ្សារ ទើបលោក Elon Musk ទទួលបានប្រាក់ខែ និងអត្ថប្រយោជន៍ផ្សេងៗ ខណៈក្នុងអំឡុងពេលនោះក្រុមហ៊ុន Tesla មានតម្លៃខ្លួនត្រឹមតែ ៥៩ពាន់លានដុល្លារតែប៉ុណ្ណោះ។

នៅក្នុងអំឡុងពេលនោះ​ មានមនុស្សជាច្រើនគិតថា វាជារឿងដែលមិនអាចទៅរួច ដោយសារតែការធ្វើឲ្យក្រុមហ៊ុនមានតម្លៃ ៥៩ពាន់លានដុល្លារ ទៅជាក្រុមហ៊ុនដែលមានតម្លៃ ៦៥០ពាន់លានដុល្លារ វាជាចំណោទដ៏ពិបាកបំផុតមួយ ខណៈពេលនោះ​ ឡានអគ្គិសនីមិនទាន់មានការពេញនិយមខ្លាំងនៅឡើយ។ ប៉ុន្ដែទោះបីជាយ៉ាងនេះក្ដី សម្រាប់សមីខ្លួនលោក Elon Musk ផ្ទាល់គឺលោកមានជំនឿយ៉ាងមុតមាំថា Telsa ជាក្រុមហ៊ុនតម្លៃ ១ទ្រីលាន ហើយលោកប្រាកដជាធ្វើវាបាន។

ក្រោយពីប្រឹងប្រែងយ៉ាងខ្លាំង ត្រឹមឆ្នាំ២០២១ លោក Elon Musk បានធ្វើឲ្យក្រុមហ៊ុន Tesla ផ្ទុះក្នុងទីផ្សារយ៉ាងខ្លាំង រហូតតម្លៃក្រុមហ៊ុន Tesla ធ្លាប់ហក់ដល់ទៅ ១.២ទ្រីលានដុល្លារ ដែលមានន័យថាលោកបានសម្រេចគោលដៅធ្វើឲ្យក្រុមហ៊ុនឡើងតម្លៃខ្លួនដល់ ៦៥០ពាន់ដុល្លារ។ ហើយលោកក៏អាចទទួលបានរង្វាន់តាមរយៈការខិតខំប្រឹងប្រែងនេះដែរ។

គួរជម្រាបផងដែរថា អ្វីដែលជាបញ្ហាគឺមកដល់ឆ្នាំ២០២៤នេះហើយ ពោលគឺមានរយៈពេល៦ឆ្នាំហើយ ប៉ុន្ដែលោក Elon Musk នៅមិនទាន់ទទួលបានរង្វាន់ឬប្រាក់ខែពីការសម្រេចការងារនេះទេ ពោលគឺតាមរយៈការសម្រេចគោលដៅខាងលើ លោក Elon Musk ត្រូវទទួលបានរង្វាន់ ៦៥ពាន់លានដុល្លារ។ យ៉ាងណាមិញ ដើម្បីទទួលបានកញ្ចប់លុយមួយកញ្ចប់ដ៏ធំមួយនេះ គឺត្រូវមានការអនុម័តពីម្ចាស់ភាគហ៊ុនធំៗជាមុនសិន។ ហើយប្រសិនបើលោក Elon Musk មិនទទួលបានកញ្ចប់ថវិកានេះទេ លោកអាចនឹងធ្វើការលាលែងតំណែងឈប់ធ្វើជា CEO ក្រុមហ៊ុន Tesla បន្ដទៀត៕