កាលពីយប់ថ្ងៃទី ១០ ខែសីហា ឆ្នាំ ២០២២ កន្លងទៅនេះ ក្រុមហ៊ុន Samsung បានប្រកាសត្រកូល Galaxy បត់អេក្រង់ជំនាន់ចុងក្រោយបំផុតក្រោមឈ្មោះថា Galaxy Z Fold 4 រួមទាំង Galaxy Z Flip 4 អមដោយនាឡិការ Galaxy Watch 5 ដែលជាជំនាន់ចុងក្រោយបំផុតផងដែរ។
សម្រាប់ Galaxy Z Fold 4 ត្រូវបានគេចាត់ទុកថាជាស្មាតហ្វូនរបស់ Samsung ខ្លាំងជាងគេបង្អស់គ្មានស្មាតហ្វូនណាមួយរបស់ Samsung អាចប្រៀបបានឡើយ ដោយស្មាតហ្វូននេះបំពាក់នូវឈីបដ៏ទំនើបបំផុត ទំហំតូចជាគេជាងឯង ពោលត្រឹមតែ 4nm ប៉ុណ្ណោះ មានល្បឿនរហូតដល់ ៣.១៨ GHz បំពាក់ Ram 12GB និង ទំហំផ្ទុករហូតដល់ទៅ 1TB ឯណោះ។
ចំពោះ Galaxy Fold ទើបតែនឹងចេញនេះ មានអេក្រង់លាតអស់ រហូត ៧.៦អ៊ីញ ជាប្រភេទអេក្រង់ច្បាស់អស់អេក្រង់ស្មាតហ្វូន Samsung ទាំងពួង ប្រភេទអេក្រង់ QXGA+ Dynamic AMOLED 2X ថែមដោយកម្រិតរអិលនៃអេក្រង់ឡើងដល់ 120Hz។
តាមការប្រកាសរបស់ Samsung បានឱ្យដឹងថា Galaxy Z Fold 4 នេះនឹងមានភាពធនខ្លាំងជាងមុនទៀត ដោយមានស៊ុមជាប្រភេទលោហៈអាលុយមីញ៉ូម ស្រោបដោយកញ្ចក់ប្រភេទ Corning Gorilla Glass Victus+ ទាំងមុខ ទាំងក្រោយ ហើយស្មាតហ្វូនប្រចាំត្រកូលកម្រិតនេះក៏មិនភ្លេចដែរនូវអាវក្រោះការពារទឹកនិង ធូលីចូលកម្រិត IPX8។
ទូរស័ព្ទថ្លៃមិនអាចខ្វះបានទេ កាមេរ៉ាអ៊េម នៅលើក្រដាស Galaxy Z Fold មានបំពាក់កាមេរ៉ាបង្កប់ក្រោមអេក្រង់ទំហំ 10 Megapixel រីឯខ្នងក្រោយវិញមានបំពាក់ភ្នែក ៣ មានដូចជា ១២ Megapixel ultra-wide លេនមេ 50 Megapixel និង ចុងក្រោយគឺលេន Telephoto ទំហំ 10 Megapixel។
សម្រាប់ថ្មវិញ Samsung នៅរក្សារទំហំ 4400 mAh ដដែល ភ្ជាប់មកជាមួយនូវបច្ចេកវិទ្យាសាកថ្មលឿន សាកថ្ម ៥០% ប្រើពេលត្រឹមតែ៣០នាទីតែប៉ុណ្ណោះ ជាមួយនឹងក្បាលសាក 25W ហើយក្រៅពីនេះនៅតែរក្សាមុខងារសាកថ្ម Wireless និង មុខងារចែកចាយថ្មផ្អិបខ្នង Wireless power sharing បានធម្មតា។
Z Fold 4 នឹងក្លាយជាស្មាតហ្វូនដំបូងបង្អស់ប្រើប្រាស់ Android 12L ដែលជាប្រភេទ Android ដែល Google ធ្វើឡើងយ៉ាងពិសេស សម្រាប់គាំទ្រពពូកស្មាតហ្វូនអេក្រង់ធំ ឬស្មាតហ្វូនអេក្រង់បត់។ ចំពោះប្រព័ន្ធទំនាក់ទំនងនិងអ៊ីនធឺណេតគ្មានអ្វីដែលគួរឱ្យភ្ញាក់ផ្អើលទេ ដែលវានឹងត្រូវបានគេបំពាក់ម៉ូដឹម 5G ប្រើប្រព័ន្ធ Wi-Fi 6E ជាដើម។
ចំពោះតម្លៃវិញវាផ្ដើមពីតម្លៃ ១៧៩៩ដុល្លារ សម្រាប់ពពួក Base Model ហើយបើ Full Option ទំហំផ្ទុក 1TB វិញ មានតម្លៃរហូតដល់ ២១៥៩.៩៩ដុល្លារ តម្លៃនៅស្រុកគេ៕
