តើអ្វីជា IP Rating?

សម្រាប់ពាក្យ IP Rating គឺមកពីពាក្យថា​ Ingress Protection Rating ដែលជាខ្នាតស្តង់ដាក្នុងការវាស់វែងពីកម្រិតនៃការជ្រាបទឹកចូលក៏ដូចជាការស្រូបធូលីចូលក្នុងឧបករណ៍ប្រើប្រាស់ផ្សេងៗដូចជាទូរស័ព្ទជាដើម ហើយខ្នាតស្តង់ដានេះគឺទទួលស្គាល់ដោយ IEC(International Electrotechnical Commision) ។

តើវាដំណើរការយ៉ាងដូចម្តេច?

គេបង្កើត​ប្រព័ន្ធការពារ​ ឬហៅ​ថា​​​ IP Rating នេះមកគឺដើម្បីការពារដីចូលឬការជ្រាបទឹកចូលជាដើម(Liquid, Solid) ហើយខ្នាតនេះគេបានបែងចែកវាជាពីរ ដែលសម្តៅលើលេខពីរខ្ទង់បន្ទាប់ពី​អក្សរ IP ដូចជា៖

• IP67 ដូច្នេះវាមានលេខពីរខ្ទង់ ហើយលេខខ្ទង់ទីមួយ(6) គឺសម្តៅលើការការពារទៅលើធូលីនិងវត្ថុរឹងផ្សេងៗឬហៅថា Solid។ រីឯខ្ទង់ទីពីរ(7) គឺសម្តៅប្រព័ន្ធការពារទឹកឬហៅថា Liquid។

ហើយខាងក្រោមនេះគឺជាតារាងសម្រាប់សម្គាល់ទៅតាមលេខនីមួយៗ

តើ IP67, IP68, IPX8 មានន័យដូចម្តេច?

​ដូច្នេះបន្ទាប់ពីមើលតារាងក៏ដូចជាផ្គូផ្គងរួចហើយអ្នកនឹងឃើញថាស្មាតហ្វូនដែលមានកម្រិត IP67 គឺជាស្មាតហ្វូនដែលអាចការពារបានទាំងធូលីចូលក៏ដូចជាធន់នឹងសម្ពាធទឹកចាប់ពី១ម៉ែត្រឡើងឡើងទៅ។

ចំណែក IP68 វិញគឺសម្តៅលើប្រព័ន្ធការពារទឹកនិងធូលីដូចគ្នាប៉ុន្តែវាការពារបានខ្លាំងជាង​ IP67 ដោយសាតែលេខសម្គាល់ខ្ទង់ទីពីរគឺលេខ 8 វាអាចរងសម្ពាធទឹកបានខ្លាំងជាង បានយូរជាង ជាក់ស្តែងដូចជា iPhone 14 Series, Galaxy S23 Series និងស្មាតហ្វូនផ្សេងៗទៀតដែលមាន IP68 គឺអាចលិចក្នុងបានជម្រៅ 1.50ម៉ែត្រឡើងទៅ បានរយៈពេលកន្លះម៉ោងថែមទៀតផង។

ដោយឡែកសម្រាប់ IPX8 វិញគឺសម្តៅលើស្មាតហ្វូនដែលអាចការពារបានតែការជ្រាបទឹកចូលនោះទេ ប៉ុន្តែសម្រាប់ធូលីវិញគឺមិនមាននោះទេ​ ដោយសារតែអក្សរ X នៅខ្ទង់ទីមួយ ដូច្នេះមានន័យថាវាមិនមានទិន្នន័យបញ្ជាក់ឬប្រព័ន្ធការពារអីនោះទេ។

ជាក់ស្តែងយើងឃើញមាននៅលើ​ស្មាតហ្វូនប្រភេទបត់មួយចំនួនដូចជា៖ Galaxy Z Fold 4, Galaxy Z Flip 4 និងប្រភេទទូរស័ព្ទបត់ផ្សេងៗទៀតដែលភាគច្រើនមានប្រព័ន្ធការពារត្រឹម IPX7 ឬ IPX8 តែប៉ុណ្ណោះ ដូច្នេះមានន័ថាវាងាយនឹងស្រូបធូលីចូលណាស់។

គូសបញ្ជាក់ផងដែរថា សម្រាប់ប្រព័ន្ធការពារខាងលើគឺគ្រាន់តែជាការតេស្តក៏ដូចជាការកំណត់ចេញពីក្រុមហ៊ុនស្មាតហ្វូននីមួយៗប៉ុណ្ណោះ ប៉ុន្តែជាក់ស្តែងអ្នកគួរតែចេះការពារនិងប្រុងប្រយ័ត្នក្នុងការប្រើប្រាស់ដោយខ្លួនឯង។

អត្ថបទដោយ៖​ រិន មករា