ថ្មីៗនេះក្រុមអ្នកស្រាវជ្រាវរបស់ក្រុមហ៊ុន Bytedance ដែលជាក្រុមហ៊ុនមេរបស់ TikTok បានធ្វើការបញ្ចេញជាមួយនឹង AI ថ្មីដែលវាមានសមត្ថភាពក្នុងការបំប្លែងពីរូបសន្លឹកធម្មតាទៅជាវីដេអូបាន ដោយអាចធ្វើឲ្យមនុស្សនិយាយ អាចរាំ អាចច្រៀងឬក៏ធ្វើកាយវិការផ្សេងៗដូចពិតៗតែម្តង។
សម្រាប់ AI ថ្មីនេះមានឈ្មោះថា OmniHuman ហើយមានចំណុចពិសេសត្រង់ថា វាអាចបំប្លែងរូបសន្លឹកពេញមួយជំហ៊ខ្លួនតែម្តងដើម្បីឲ្យធ្វើកាយវិការឬក៏សកម្មភាពផ្សេងៗ វាខុសពី AI Model មុនៗអាចបំប្លែងបានត្រឹមតែរូបមនុស្សពាក់កណ្តាលខ្លួនឡើងលើនោះទេ។ លើសពីនេះទៅទៀតសម្រាប់ OmniHuman វាអាចឲ្យការនិយាយ ដំណើររបស់មនុស្សយើងមើលទៅដូចពិតៗតែម្តង។
សម្រាប់ម៉ូដែល AI ថ្មីនេះ ក្រុមអ្នកអភិវឌ្ឍរបស់ក្រុមហ៊ុន Bytedance បានធ្វើការបញ្ចូលទិន្នន័យ (Trained) ជាប្រភេទវីដេអូរហូតដល់ទៅរយៈពេលជាង 18,700 ម៉ោង ដោយយកចេញពីរឿងប្រលោមលោក និវិធីសាស្រ្តច្រើនទៀតដូចជា ការបញ្ចូលពាក្យ បញ្ចូលសំឡេង រួមទាំងការធ្វើចលនារបស់មនុស្សផងដែរ។
ក្នុងនោះផងដែរគេក៏បានបង្ហាញវីដេអូគម្រូរជាច្រើនដែលត្រូវបានបង្កើតឡើងដោយ OmniHuman មានទាំងបំប្លែងពីរូបសន្លឹកទៅជាវីដេអូ កែសម្រួលកាយវិការរបស់មនុស្សចេញពីវីដេអូដែលមានស្រាប់ និងប្រភេទវីដេអូជាច្រើនទៀត។
អត្ថបទដោយ៖ រិន មករា
