ជាក់ស្ដែង បើតាមការចុះផ្សាយរបស់សារព័ត៌មាន Bloomberg បានឱ្យដឹងថា គិតចាប់តាំងពីដើមឆ្នាំ មកដល់ត្រឹមខែកញ្ញា នៃឆ្នាំ២០២២នេះ លោក Mark Zuckerberg បានធ្លាក់ទ្រព្យសម្បត្តិផ្ទាល់ខ្លួនរហូតដល់ទៅ ៧១ពាន់លានដុល្លារ ពោលគឺធ្លាក់ទ្រព្យសម្បត្តិផ្ទាល់ខ្លួនច្រើនជាងគេក្នុងបណ្ដាមហាសេដ្ឋីទ្រព្យពាន់លានដុល្លារដទៃទៀត។

ដោយឡែក សម្រាប់មូលហេតុដែលធ្វើឱ្យលោកធ្លាក់ទ្រព្យសម្បត្តិច្រើនបែបនេះ គឺដោយសារតែចាប់តាំងពីដើមឆ្នាំមក បញ្ហាសង្គមទូទៅមានដូចជា បញ្ហាជំងឺរាតត្បាតកូវីដ១៩ និងបញ្ហាអតិផរណាជាដើម។ ហើយចំណែកឯ Facebook ដែលជាប្រភពចំណូលធំរបស់ Meta វិញ ក៏ជួបបញ្ហាធ្លាល់ចំនួនអ្នកប្រើប្រាស់ និងធ្លាក់ចំណូលជាលើកដំបូងបំផុតក្នុងប្រវត្តិសាស្ដ្រដែលធ្វើឱ្យអ្នកវិនិយោគផ្អើលលក់ហ៊ុនចេញ រហូតធ្វើឱ្យបាត់តម្លៃហ៊ុន ៣៦០ប៊ីលានដុល្លារត្រឹមរយៈពេល១ថ្ងៃ។

ជាមួយគ្នានេះដែរ បញ្ហាធំមួយទៀតគឺក្នុងមួយឆ្នាំ Meta ខាតលុយ១០ពាន់លានដុល្លារ ដោយសារតែការវិនិយោគទៅលើពិភពសុប្បនិម្មិត Metaverse ដើម្បីបោះជំហានឱ្យបានមុនគេ ខណៈ Mark Zuckerberg មានជំនឿចិត្តថា Metaverse គឺជាទំនោរបច្ចេកវិទ្យាថ្មីដែលមនុស្សនឹងប្រើនាពេលអនាគតដ៏ខ្លីខាងមុខនេះ។

គួរជម្រាបផងដែរថា​ ចាប់តាំងពីចុងឆ្នាំ២០២១ កន្លងមក Mark Zuckerberg បានប្ដូរឈ្មោះទៅជា Meta និងបានងាកទៅផ្ដោតលើពិភពសុប្បនិម្មិត​ Metaverse ដើម្បីចាប់ទំនោរអនាគតមុនគេ។ ប៉ុន្ដែអ្វីដែលជាបញ្ហាការវិនិយោគទៅលើ Metaverse របស់លោក Mark Zuckerberg មិនទាន់ចេញជាផ្លែផ្កា បូករួមនឹងបញ្ហាផ្សេងៗទៀត ជាហេតុធ្វើឱ្យលោក Mark Zuckerberg ធ្លាក់ទ្រព្យច្រើននៅក្នុងឆ្នាំ២០២២នេះ។ យ៉ាងណាក៏ដោយ  ជាធម្មតាការវិនិយោគទៅលើបច្ចេកវិទ្យាថ្មីដូចជា Metaverse បែបនេះ គឺគេមិនទាន់អាចនិយាយបានទេថា តើអនាគតនឹងទៅជាយ៉ាងណា។ ហើយយើងនឹងរង់ចាំមើលបន្ដទៀតថា តើលោក Mark Zuckerberg គិតត្រូវឬគិតខុស ហើយគាត់អាចផ្លាស់ប្ដូរពិភពលោកម្ដងទៀត ដូចជំនាន់បង្កើត Facebook ឬយ៉ាងណា៕