បច្ចុប្បន្ននេះផ្លេតហ្វម YouTube មិនត្រឹមតែជាកន្លែងសម្រាប់ឱ្យ Creator អាចផលិតវីដេអូដាក់ចូលដើម្បីបង្ហាញទៅកាន់ពិភពលោកនោះទេ ដោយថ្មីៗនេះ YouTube បានបញ្ចេញមុខងារពិសេសមួយទៀតគឺ Shopping Feature ដែលអនុញ្ញាតឱ្យអ្នកដែលខំចំណាយពេល ចំណាយធនធានផលិតវីដេអូ អាចដាក់លក់ទំនិញដោយផ្ទាល់ជាមួយនឹង YouTube តាមរយៈការសហការជាមួយនឹង Shopify។
ដោយយោងទៅតាមការចុះផ្សាយរបស់ YouTube បានបង្ហាញថា ក្រុមហ៊ុនរបស់ខ្លួនបានសហការចាប់ដៃគ្នាជាមួយនឹង Shopify ដោយបើកដៃឱ្យអ្នកផលិតវីដេអូ ដាក់តាំងក៏ដូចជាបង្ហាញ ទំនិញផ្សេងៗ នៅខាងក្រោម Channel របស់ខ្លួន កំឡុងពេលដែលកំពុង Livestream ឬដាក់បង្ហាញនៅចុងបញ្ចប់នៃវីដេអូ។
ក្នុងនោះផងដែរចំពោះទំនិញដែលអ្នកផលិតវីដេអូចង់ដាក់លក់គឺត្រូវតែមាននៅក្នុង Shopify ដែលវាអាចបង្កភាពងាយស្រួលដល់អ្នកទស្សនាក្នុងការមើលដឹងថា តើទំនិញមួយណានៅសល់ស្តុកនិងមួយណាអស់ពីស្តុកពោលគឺ វាបង្ហាញភ្លាមៗនៅក្រោម Channel តែម្តង។ យ៉ាងណាមិញ មុខងារមួយនេះនឹងត្រូវដាក់ឱ្យប្រើប្រាស់នៅអាមេរិច ប្រហ្ស៊ីល ឥណ្ឌា សិន។
គូសបញ្ជាក់ផងដែរថា ការធ្វើបែបនេះគឺ YouTube ចង់ឱ្យ Creator ក៏ដូចជាអ្នកផលិតវីដេអូផ្សេងៗរក្សានូវអ្វីដែលខ្លួនកំពុងតែធ្វើរាល់ថ្ងៃដាក់នៅលើ YouTube បន្តទៅទៀតជាមួយនឹងការបន្ថែមមុខងារ Shopping ដែលម្ចាស់ Channel អាចគ្រប់គ្រងនិងជ្រើសរើសទំនិញផ្សេងៗដែលខ្លួនមានដើម្បីបង្ហាញនៅលើ Channel។
ដូច្នេះចំពោះម្ចាស់ Channel ដែលគ្រប់លក្ខខណ្ឌ គឺពួកគេអាចចូលទៅដំណើរការមុខងារ Live Shopping បាន ដោយអាចមានសិទ្ធក្នុងការភ្ជាប់ទំនិញដែលខ្លួនមានទៅកាន់ការ Livestream ដោយផ្ទាល់តែម្តង។
សម្រាប់អ្នកទាំងអស់គ្នាវិញគិតយ៉ាងណាដែរចំពោះមុខងារមួយនេះ ប្រសិនបើ YouTube បើកទូលលំទូលាយនៅស្រុកខ្មែរ តើអ្នកនឹងប្រើវាទេ?
អត្ថបទដោយ៖ រិន មករា
