តុលាការធម្មនុញ្ញប្រទេសថៃ នៅថ្ងៃពុធ ទី១៤ ខែសីហា ឆ្នាំ២០២៤នេះ បានដកប្រកាសដកតំណែងលោកនាយករដ្ឋមន្រ្តី សេដ្ឋា ថាវីស៊ីន (Srettha Thavisin) ក្រោមចោទប្រកាន់ថា លោកបានបំពានរដ្ឋធម្មនុញ្ញ ជុំវិញការតែងតាំងគណៈរដ្ឋមន្ត្រីកាលពីខែមេសា។ នេះបើតាមការចុះផ្សាយរបស់សារព័ត៌មាន Nikkei Asai។

ប្រភពដដែលបានឲ្យដឹងទៀតថា មុននឹងឈានដល់ការសម្រេចនៅថ្ងៃនេះ កាលពីខែឧសភា កន្លងទៅសមាជិកព្រឹទ្ធសភាថៃមួយក្រុម បាន​រួមគ្នាធ្វើញត្តិមួយប្តឹងទៅកាន់តុលាការធម្មនុញ្ញថៃ ដើម្បីទាមទារ​ឲ្យ​ទម្លាក់ ​លោក​នាយករដ្ឋមន្ត្រី សេដ្ឋា ថាវីស៊ីន ពីតំណែង ក្រោយបទពាក់ព័ន្ធនឹងការតែងតាំងរដ្ឋមន្ត្រីម្នាក់ ឈ្មោះ​ Pichit Chuenban ខណៈបុគ្គលរូបនេះ ធ្លាប់ជាប់​ពន្ធនាគារ ពីបទសូកប៉ាន់ និងប្រមាថ​មើល​ងាយ​មកលើ​ប្រព័ន្ធតុលាការ​។

គួរជម្រាបផងដែរថា លោក សេដ្ឋា ថាវីស៊ីន (Srettha Thavisin) បានឡើងកាន់តំណែងជានាយករដ្ឋមន្ដ្រីថៃនៅថ្ងៃទី២៣ ខែសីហា ឆ្នាំ២០២៣ និងត្រូវដកចេញពីតំណែងនៅថ្ងៃទី១៤ ខែសីហា ឆ្នាំ២០២៤៕