ភ្នំពេញ៖ ក្រុមហ៊ុន RMA (Cambodia) PLC បានចេញសេចក្តីប្រកាសព័ត៌មានមួយបន្ទាប់ពីមានករណីអគ្គីភ័យឆាបឆេះរថយន្ត Defender ដែលកំពុងតែមានការចាប់អារម្មណ៍ខ្លាំងពីសំណាក់មហាជន។
ក្នុងសេចក្តីប្រកាសព័ត៌មានចុះថ្ងៃទី១០ ខែកុម្ភៈ ឆ្នាំ២០២៥ ក្រុមហ៊ុន RMA Cambodia បានសម្តែងនូវការសោកស្តាយចំពោះឧបទ្ទវហេតុអគ្គីភ័យនេះ។ ក្រុមហ៊ុនបានបញ្ជាក់ថា រថយន្តដែលរងការខូចខាតដោយសារអគ្គីភ័យទាំងនោះមិនមែនជារថយន្តដែលនាំចូលនិងចែកចាយដោយក្រុមហ៊ុន RMA Cambodia ឡើយ។
ក្រុមហ៊ុនបានបន្តទៀតថា ខ្លួនគឺជាក្រុមហ៊ុនដែលទទួលសិទ្ធិនាំចូលរថយន្ត Range Rover និង Defender ផ្ទាល់ពីរោងចក្រនៅប្រទេសអង់គ្លេស។ ដូច្នេះ ក្រុមហ៊ុនបានអំពាវនាវដល់សាធារណជនឲ្យមានការប្រុងប្រយ័ត្នក្នុងការជ្រើសរើសរថយន្ត និងសូមឲ្យពិនិត្យប្រភពដើមនៃរថយន្តឲ្យបានច្បាស់លាស់មុននឹងធ្វើការទិញ។
លើសពីនេះ ក្រុមហ៊ុន RMA Cambodia ក៏បានលើកទឹកចិត្តឲ្យអតិថិជននាំរថយន្តរបស់ខ្លួនទៅធ្វើការថែទាំនៅមជ្ឈមណ្ឌលសេវាកម្មដែលមានការទទួលស្គាល់និងបណ្តុះបណ្តាលត្រឹមត្រូវពីរោងចក្រប្រទេសអង់គ្លេស ដើម្បីធានានូវសុវត្ថិភាពនិងគុណភាព។
សេចក្តីប្រកាសព័ត៌មាននេះត្រូវបានគេមើលឃើញថា ជាការឆ្លើយតបរបស់ក្រុមហ៊ុន RMA Cambodia បន្ទាប់ពីមានការព្រួយបារម្ភនិងចោទសួរជាច្រើនពីមហាជនពាក់ព័ន្ធនឹងករណីអគ្គីភ័យឆាបឆេះរថយន្តម៉ាកល្បីៗទាំងនេះ។
