យោងទៅតាមការចុះផ្សាយរបស់ The NewYork Time បានឲ្យដឹងថា ក្រុមហ៊ុន Samsung កំពុងធ្វើការពិចារណាលើការដាក់ Microsoft Bing ដែលដំណើរការដោយបច្ចេកវិទ្យា AI ថ្មីដើម្បីដាក់ចូលទៅក្នុងស្មាតហ្វូនរបស់ខ្លួនធ្វើជា Defualt Search Engine ជំនួសឲ្យ Google វិញ ដែលដំណឹងមួយនេះក៏ធ្វើឲ្យខាង Google មិនសូវជាសប្បាយចិត្តប៉ុន្មានទេ។

លើសពីនេះទៅទៀត The NewYork Time ក៏បានបន្ថែមថា បើតាមការប៉ាន់ស្មាន ក្រុមហ៊ុន​ Google គឺបានចំណាយលុយខ្ទង់៣ពាន់លានដុល្លារក្នុង១ឆ្នាំៗ ទៅលើកិច្ចសន្យាជាមួយ Samsung ដើម្បីដាក់បញ្ចូល Google Search របស់ខ្លួន។​ មិនតែប៉ុណ្ណោះក្នុងកិច្ចសន្យាស្រដៀងគ្នានេះ Google ក៏បានចំណាយលុយ ២០ពាន់លានដុល្លារ ផងដែរហើយក៏ត្រូវបន្តក្នុងឆ្នាំ២០២៣នេះទៀត។

យ៉ាងណាមិញ ចំពោះកិច្ចសន្យារបស់ Samsung ថ្មីនេះគឺមិនទាន់មានភាពច្បាស់លាស់នៅឡើយថាSamsung ពិតជាជ្រើសរើសយក Microsoft Bing ជាជាងការចាប់ដៃជាមួយ Google ដដែលឬក៏យ៉ាងណានោះទេ។

ម្យ៉ាងទៀតបើប្រៀបធៀបរវាង Google Search Engine ជាមួយ Microsoft Bing គឺស្រដៀងតែគ្នាតែប៉ុន្តែអ្វីដែលធ្វើឲ្យ Bing លេចធ្លោជាងនោះគឺ​ Microsoft បានបញ្ចូលមុខងារ Bing Chat ដែលដំណើរការដោយបច្ចេកវិទ្យា​ AI របស់ ChatGPT ដែលបច្ចុប្បន្ន Google គឺមិនទាន់អភិវឌ្ឍដល់នៅឡើយទេ។

គូសបញ្ជាក់ផងដែរថា ប្រសិនបើ Samsung នឹងដាក់បញ្ចូល Microsoft Bing ធ្វើជា Default Search Engine ពិតមែន គឺមិនមែនមានន័យថានៅលើស្មាតហ្វូន Samsung លែងមាន Google ប្រើនោះទេ​ពោលគឺយើងនៅតែអាចទាញយក Google យកមកប្រើប្រាស់បានដដែលគ្រាន់តែមិនមែនជា Default ដែលយើងបើកមកឃើញដូចមុន។

អត្ថបទដោយ៖ រិន មករា