យោងតាមសេចក្តីប្រកាសផ្លូវការ ទីតាំងដែលនឹងក្លាយជាសមរភូមិប្រកួតប្រជែងបញ្ចេញស្នាដៃរ៉ូបូតរបស់យុវជនកម្ពុជានាឆ្នាំនេះ គឺត្រូវបានកំណត់យក «សាលដំបូលទូក» ស្ថិតក្នុងបរិវេណ នៃសាកលវិទ្យាល័យភូមិន្ទភ្នំពេញ (RUPP)។ ការប្រកួតនេះនឹងប្រព្រឹត្តទៅពេញមួយថ្ងៃ គឺនៅថ្ងៃទី០៥ ខែកក្កដា ឆ្នាំ២០២៦ ខាងមុខនេះ។

ព្រឹត្តិការណ៍ Robocon ថ្នាក់ជាតិ តែងតែជាវេទិកាដ៏សំខាន់មួយក្នុងការជំរុញ និងលើកទឹកចិត្តដល់យុវជនកម្ពុជា ឱ្យបញ្ចេញនូវទេពកោសល្យ គំនិតច្នៃប្រឌិត និងសមត្ថភាពជាក់ស្តែងទៅលើផ្នែកបច្ចេកវិទ្យា មនុស្សយន្ត (Robotics) និងវិស្វកម្ម។ ការប្រកួតលើកទី១៣ នេះ ត្រូវបានគេរំពឹងថានឹងកាន់តែមានភាពស្វិតស្វាញ និងទាក់ទាញ ជាមួយនឹងការនាំយកនូវបច្ចេកវិទ្យាថ្មីៗពីសំណាក់ក្រុមនិស្សិតតំណាងសាកលវិទ្យាល័យនានា។

គួរបញ្ជាក់ផងដែរថា ព្រឹត្តិការណ៍ដ៏មានសារៈសំខាន់នេះ ទទួលបានការសហការរៀបចំដោយ ក្រសួងព័ត៌មាន និងអគ្គនាយកដ្ឋានទូរទស្សន៍ជាតិកម្ពុជា (TVK) ព្រមទាំងមានការគាំទ្រយ៉ាងពេញទំហឹងពីសំណាក់ស្ថាប័ន និងក្រុមហ៊ុនធំៗរួមមាន៖ សហគ្រិនខ្មែរ (Khmer Enterprise), ក្រុមហ៊ុន Toyota, Royal Group, Nescafe, ភេសជ្ជៈ Krud និងទឹកបរិសុទ្ធ V-Active ដែលបង្ហាញពីការយកចិត្តទុកដាក់រួមគ្នាក្នុងការអភិវឌ្ឍធនធានមនុស្សក្នុងវិស័យ STEM នៅកម្ពុជា។

គណៈកម្មការរៀបចំកម្មវិធី សូមអំពាវនាវ និងស្វាគមន៍យ៉ាងកក់ក្តៅចំពោះសាធារណជន សិស្ស-និស្សិត និងអ្នកដែលស្រឡាញ់វិស័យបច្ចេកវិទ្យាទាំងអស់ អញ្ជើញចូលរួមទស្សនាដោយផ្ទាល់ និងផ្តល់កម្លាំងចិត្តដល់បេក្ខជនទាំងអស់ឱ្យបានកុះករ។