ក្រោយពីការសម្រាំងជាច្រើនដំណាក់កាល មានតែធុរកិច្ចថ្មីចំនួន ៧ ក្រុមប៉ុណ្ណោះដែលបានឈានចូលដល់ «ថ្ងៃបទបង្ហាញសាធារណៈ» ដែលជាវគ្គផ្តាច់ព្រ័ត្រនៃកម្មវិធីនវានុវត្តន៍បញ្ច្រាស រដូវកាលទី ៤ និង បានធ្វើបទបង្ហាញអំពីគំនិតអាជីវកម្មខ្លួនទៅកាន់គណៈកម្មការដើម្បីដណ្តើមយកជ័យលាភី ដោយក្នុងនោះរួមមាន៖ Snaprec, Krubkrong, MyLekha, JayTech, Quanta, PlantItAll, និង Cassandra។ ទុនវិនិយោគដែលមិនយកភាគហ៊ុន (Equity-free Investments) សរុបចំនួន ១២៨ លានរៀល ត្រូវបានប្រើប្រាស់ដើម្បីផ្តល់ជូនដល់ធុរកិច្ចថ្មីឆ្នើមទាំង ៥ ក្រុមហើយនាមជា Top performance ជាមួយនឹងទឹកប្រាក់ចំនួន ៤០ លានរៀលទៅកាន់ Mylekha, នាមជា Special mention ជាមួយនឹងទឹកប្រាក់ចំនួន ២៨ លានរៀលទៅកាន់ Krubkrong និង នាមជា Top finalists ជាមួយនឹងទឹកប្រាក់ចំនួន ២០ លានរៀលក្នុងមួយក្រុមទៅកាន់ Snaprec, Jaytech និង Quanta។

កម្មវិធីនវានុវត្តន៍បញ្រ្ចាសរដូវកាលទី ៤ គឺជាកម្មវិធីពន្លឿនអាជីវកម្មមួយដែលរៀចំឡើង ដោយផ្ដោតលើប្រធានបទបច្ចេកវិទ្យាហិរញ្ញវត្ថុជាចំបង ​ដោយក្នុងនោះស្ថាប័នធំៗ ឬ អ្នកដឹកនាំ នៃឧស្សាហកម្មបានធ្វើការចែករំលែកអំពីបញ្ហាប្រឈមរបស់ខ្លួន​ដើម្បីឱ្យធុរកិច្ចថ្មីស្វែងរក និង អភិវឌ្ឍនូវសេវាកម្ម ឬ ផលិតផលណាមួយដែលអាចក្លាយជាដំណោះស្រាយសម្រាប់បញ្ហាប្រឈម ទាំងនោះ។  

គួរបញ្ជាក់ផងដែរថា កម្មវិធីនវានុវត្តន៍បញ្រ្ចាសរដូវកាលទី ៤ ត្រូវបានរៀបចំដោយ ក្រសួងសេដ្ឋកិច្ច និងហិរញ្ញវត្ថុ និង មជ្ឈមណ្ឌលបណ្ដុះធុរកិច្ចថ្មី "តេជោ", ដោយមានការសហការរៀបចំកម្មវិធីដោយ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និង សហគ្រិនខ្មែរ រួមទាំង អ្នកឧបត្ថម្ភកម្មវិធីធំ៖ ធនាគារ វីង និង ដៃគូផ្សព្វផ្សាយ៖ Fresh News និង Technology Cambodia។

ព័ត៌មានទំនាក់ទំនង៖
- អំពីកម្មវិធី៖ កញ្ញា ប៊ុនឋាន សុផាវីណា , លេខទូរសព្ទ៖ +៨៥៥ ១៧ ៧៨១ ០៨៨
- សម្រាប់ព័ត៌មានបន្ថែម៖ https://ri.techostartup.center/