ព្រឹត្តិការណ៍នេះធ្វើឡើងក្នុងគោលបំណងបង្ហាញដំណោះស្រាយបច្ចេកវិទ្យាទំនើបចុងក្រោយ និងពង្រឹងសមត្ថភាពសន្តិសុខប្រព័ន្ធព័ត៌មានវិទ្យាដល់បណ្ដាស្ថាប័ននានាក្នុងប្រទេសកម្ពុជា ដូចជា វិស័យធនាគារ និងឯកជនផ្សេងៗ។

ក្រុមហ៊ុន Infinotix ដែលទើបចាប់ផ្ដើមដំណើរការជាផ្លូវការកាលពីខែឧសភា ឆ្នាំ ២០២៥ កន្លងទៅនេះ ដោយកូនខ្មែរ ១០០% ដែលបានប្ដេជ្ញាចិត្តក្នុងការនាំចូលផ្ដល់ជូននូវដំណោះស្រាយបច្ចេកវិទ្យាដ៏មានប្រសិទ្ធភាព និងភាពជាដៃគូដ៏រឹងមាំ ដោយផ្ដោតលើគំរូអាជីវកម្មជាក្រុមហ៊ុន ចែកចាយ (Distributor)។ Infinotix មានបេសកកម្មចម្បងក្នុងការជួយគាំទ្រទាំងដៃគូពាណិជ្ជកម្ម និងអ្នកប្រើប្រាស់ដើម្បីឱ្យមានប្រព័ន្ធសន្តិសុខបច្ចេកទេសប្រកបដោយគុណភាពខ្ពស់ និងភាពទាន់ពេលវេលាពីការវាយប្រហារផ្សេងៗ។ Infinotix បានទទួលការអនុញ្ញាតពេញលេញ (Authorized Distributor) ពីក្រុមហ៊ុនធំៗទាំង ៦ រួមមាន F5, Menlo Security, Bitdefender, Accalvio, Accuknox និង SendQuick។

"ក្នុងយុគសម័យបច្ចេកវិទ្យា បញ្ញាសិប្បនិម្មិត (AI) និងការវាយប្រហារដ៏ទំនើបពីសំណាក់ Hacker គ្រប់វិស័យទាំងអស់រួមមាន ធនាគារ រដ្ឋាភិបាល និង បណ្តាក្រុមហ៊ុនឯកជនផ្សេងទៀត ចាំបាច់ត្រូវតែធ្វើ ទំនើបកម្មប្រព័ន្ធសន្តិសុខអ៊ីនធឺណិត (Cybersecurity) របស់ខ្លួន ដើម្បីទប់ស្កាត់នូវមហន្តរាយដែលអាចកើតមាន។" នេះជាការលើកឡើងរបស់លោក ហេង ម៉េងហ៊ុយ នាយកគ្រប់គ្រងរបស់ក្រុមហ៊ុន Infinotix។

ព្រឹត្តិការណ៍នេះទទួលបានការចូលរួមយ៉ាងផុសផុលពីសំណាក់ដៃគូអាជីវកម្ម អ្នកតំណាង និងអ្នកជំនាញមកពីវិស័យធនាគារ ស្ថាប័នរដ្ឋាភិបាល និងវិស័យឯកជនជាច្រើន។

ជាចុងក្រោយ ក្រុមហ៊ុន Infinotix បានថ្លែងអំណរគុណដល់ ដៃគូអាជីវកម្ម និង អតិថិជន ទាំងអស់ ដែលបានចូលរួមក្នុង កម្មវិធី ហើយនឹងព្យាយាមនាំយកនូវ បច្ចេកវិទ្យាថ្មីៗ បន្ថែមទៀតដើម្បីជា ដំណោះស្រាយល្អៗ សំរាប់អតិថិជននៅក្នុងប្រទេសកម្ពុជា។