ក្រសួងកសិកម្ម រុក្ខាប្រមាញ់ និងនេសាទ នឹងរៀបចំព្រឹត្តិការណ៍ «វេទិកា និងពិព័រណ៍កសិកម្មកម្ពុជា ឆ្នាំ២០២៦» ដ៏ធំបំផុត ដែលមានរយៈពេល ៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦ នៅមណ្ឌលសន្និបាត និងពិព័រណ៍កោះពេជ្រ នាពេលខាងមុខ។ ពិព័រណ៍កសិកម្មដ៏ធំបំផុតលើកទី២ នេះ នឹងមានការដាក់តាំងបង្ហាញពីបច្ចេកវិទ្យាកសិកម្មទំនើប ដូចជា គ្រឿងយន្តកសិកម្ម បច្ចេកវិទ្យាដ្រូន បច្ចេកវិទ្យាឌីជីថល ធាតុចូលកសិកម្ម បច្ចេកវិទ្យាកែច្នៃ និងវេចខ្ចប់ ដំណោះស្រាយកសិកម្មធន់នឹងអាកាសធាតុ ព្រមទាំងសេវាហិរញ្ញវត្ថុ និងសេវាអាជីវកម្ម ដែលអាចជួយដោះស្រាយបញ្ហាថ្លៃដើម និងទីផ្សារជូនបកសិករ។
ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម បានបញ្ជាក់ថា ព្រឹត្តិការណ៍ CAFE26 មិនមែនផ្តោតតែលើការតាំងពិព័រណ៍នោះទេ ប៉ុន្តែជាផ្នែកមួយនៃការជំរុញការអភិវឌ្ឍវិស័យកសិកម្ម តាមរយៈការតភ្ជាប់ខ្សែច្រវាក់តម្លៃឱ្យបានពេញលេញ ជំរុញបច្ចេកវិទ្យា និងនវានុវត្តន៍ក្នុងវិស័យកសិស្បៀងអាហារនៅកម្ពុជា។ វេទិកានេះ នឹងអាចជាស្ពានតភ្ជាប់កសិករទៅទីផ្សារ អាជីវកម្មទៅការវិនិយោគ បច្ចេកវិទ្យាទៅអ្នកប្រើប្រាស់ជាដើម។
ជាមួយគ្នានេះ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម បានបន្ថែមថា វេទិកា CAFE26 នឹងតភ្ជាប់តួអង្គពាក់ព័ន្ធ ក្នុងខ្សែច្រវាក់តម្លៃកសិកម្ម រួមមាន កសិករ អាជីវករ អ្នកផលិត អ្នកកែច្នៃ ពាណិជ្ជករ វិនិយោគិន អ្នកតាក់តែងគោលនយោបាយ ដៃគូអភិវឌ្ឍន៍នានា និងសាធារណជន។ CAFE26 នេះ រៀបចំដោយក្រសួងកសិកម្ម, អង្គការ FAO, ក្រុមហ៊ុន One Event និងដៃគូអភិវឌ្ឍន៍ ត្រូវបានរំពឹងទុកថា មានអ្នកចូលទស្សនាប្រមាណ ២,៥ ម៉ឺននាក់ និងកសិករជាង ២ពាន់នាក់ ពិសេសនឹងមានស្តង់តាំងបង្ហាញចំនួន៤០០ ចូលរួម។
គួរបញ្ជាក់ថា វេទិកា CAFE26 នឹងមានកិច្ចពិភាក្សាផ្តោតលើបរិយាកាស និងការលើកទឹកចិត្តការវិនិយោគនៅកម្ពុជា យន្តការហិរញ្ញប្បទាន ការកែច្នៃកសិផល និងការបង្កើតតម្លៃបន្ថែម ការប្រែប្រួលទីផ្សារសកល ធាតុចូលកសិកម្មជាយុទ្ធសាស្ត្រ បច្ចេកវិទ្យាកសិកម្ម និងកសិកម្មឆ្លាតវៃ ព្រមទាំងការអភិវឌ្ឍខ្សែច្រវាក់តម្លៃប្រកបដោយភាពប្រកួតប្រជែងនិង បរិយាបន្ន៕
