TikTok គឺជាបណ្តាញសង្គមដ៏ល្បីល្បាញបំផុតមួយលើលោក ដោយផ្លែតហ្វមួយនេះ ក្រៅពីត្រូវបានគេប្រើប្រាស់ដើម្បីកំសាន្ដ វាក៏ជាកន្លែងមួយដែលអាចជួយឱ្យអ្នកផលិតវីដេអូអាចរកចំណូលបានផងដែរ។ ជាក់ស្ដែងកាលពីពេលថ្មីៗនេះ TikTok បានបង្កើតកម្មវិធីថ្មីមួយដែលមានឈ្មោះថា Tiktok Pulse បើកឱ្យមនុស្សទូទៅអាចរកចំណូលបានតាមរយៈការផលិតវីដេអូដាក់នៅលើផ្លេតហ្វម TikTok ដូចទៅនឹងការផលិតវីដេអូដាក់ YouTube ដើម្បីរកលុយដែរ។
បើតាមការចុះផ្សាយនៅលើគេហទំព័រផ្លូវការរបស់ Tiktok បានឱ្យដឹងថា ដើម្បីអាចរកលុយបានពីការបង្ហោះវីឌេអូលើ TikTok គណនីរបស់អ្នកត្រូវមានអ្នកតាមដាន (Followers) ចំនួន មួយសែននាក់ឡើងទៅ។ សម្រាប់ការរកលុយពី Tiktok Pulse នេះ អ្នកអាចរកចំណូលបានតាមរយៈការបង្ហាញពាណិជ្ជកម្មនៅលើវីដេអូរបស់អ្នក ដោយចំណូលសរុបពីការផ្សាយពាណិជ្ជកម្ម នឹងត្រូវចែកគ្នាម្នាក់ ៥០% ជាមួយខាងក្រុមហ៊ុន TikTok។
ជាមួយគ្នានេះដែរ ប្រភេទវីដេអូដែល មានឱកាសត្រូវបាន TikTok ដាក់ពាណិជ្ជកម្មច្រើនជាងគេរួមមាន ប្រភេទវីដេអូចម្អិនម្ហូប ច្នៃម៉ូតសម្លៀកបំពាក់ ហ្គេម ចិញ្ចឹមសត្វ យានតយន្តអូតូ កីឡា ភាសារអេស្ប៉ាញ ការធ្វើ Reaction វីដេអូ Prank វីដេអូសាច់រឿងខ្លីៗ និងវីដេអូរាំ។
គួរជម្រាបផងដែរថា សម្រាប់មុខងារ Tiktok Pulse នេះ TikTok សម្រេចដាក់ឱ្យដំណើរការមុនគេនៅសហរដ្ឋអាមេរិកដើម្បីតេស្ដសាកល្បងជាមុនសិន មុននឹងសម្រេចដាក់ឱ្យបណ្ដាប្រទេសដទៃទៀតប្រើប្រាស់មុខងារមួយនេះ។ យ៉ាងណាមិញ ថ្វីត្បិតតែមិនទាន់មានពាណិជ្ជកម្មអ្នកនៅតែអាចផលិតវីដេអូដាក់ TikTok ដើម្បីរកចំណូលបានដដែល តាមរយៈការទទួលផ្សព្វផ្សាយ (Sponsore) ផលិតផល ឬសេវាកម្មឱ្យក្រុមហ៊ុនផ្សេងៗ៕
អត្ថបទដោយ៖ អូន រ៉ាទី
