TikTok ដែលជាប្លេតហ្វមផ្ដោតលើវីដេអូទម្រង់ខ្លីៗជាមួយបេសកកម្មលើកទឹកចិត្ដបង្កើតឱ្យមានច្នៃប្រឌិត និងកម្សាន្ដសប្បាយ កំពុងប្រើប្រាស់បច្ចេកវិទ្យាទំនើបរួមមួយ ដោយមានជំនួយពីមនុស្សដើម្បីជួយរក្សាសុវត្ថិភាពដល់អ្នកប្រើប្រាស់កម្ពុជានៅលើអនឡាញ។
ដូចដែល TikTok បានពន្យល់ក្នុងរបាយការណ៍តម្លាភាព (Transparency Report) ចុងក្រោយបំផុតរបស់ខ្លួន វីដេអូបំពានគោលនយោបាយសុវត្ថិភាព ៨៧,៥ភាគរយត្រូវបានលុបចោលភ្លាមៗមុនពួកគេទទួលបានអ្នកចូលទស្សនាសូម្បីតែម្ដង ហើយ TikTok ប្ដេជ្ញាចិត្ដបន្ដអភិវឌ្ឍឱ្យកាន់តែមានប្រសិទ្ធភាពក្នុងការដោះស្រាយបញ្ហានេះ។
Kyu Kyu Thein នាយកគ្រប់គ្រងផ្នែកគោលនយោបាយសាធារណៈនៃក្រុមហ៊ុន TikTok ប្រចាំនៅកម្ពុជា បានមានប្រសាសន៍ថា៖ «នៅក្រុមហ៊ុន TikTok បុគ្គលិករាប់ពាន់នាក់កំពុងផ្ដោតលើកិច្ចការជួយឱ្យប្លេតហ្វមមួយនេះមានសុវត្ថិភាពសម្រាប់សហគមន៍របស់យើងក្នុងការរុករកមាតិកាកម្សាន្ដ និងចែករំលែកវីដេអូផលិតឡើងបែបច្នៃប្រឌិតរបស់ពួកគេ។ ក្រុមការងារផ្នែកជំនឿចិត្ដ និងសុវត្ថិភាព (Trust and Safety) នៅ TikTok កំពុងបំពេញការងារទៅតាមជំនាញរៀងៗខ្លួនដើម្បីការពារសហគមន៍យើង។ ខណៈពេលយើងបន្ដបោះជំហានទៅមុខប្រកបដោយសុវត្ថិភាព យើងចង់ឱ្យវាមានការបើកទូលាយ និងតម្លាភាព ហើយយើងនឹងជជែកអំពីបញ្ហានេះនៅខាងក្រោម»។
ការបង្កើត និងធ្វើបច្ចុប្បន្នភាពគោលការណ៍ណែនាំសហគមន៍របស់ TikTok
គោលការណ៍ណែនាំសហគមន៍ របស់ TikTok បានកំណត់បទដ្ឋានមួយចំនួន ក៏ដូចជាក្រមសីលធម៌ទូទៅសម្រាប់ ប្លេតហ្វមវីដេអូ TikTok ដ៏ពេញនិយម ដោយពួកគេបានផ្ដល់នូវការណែនាំស្ដីពីអ្វីដែលត្រូវបាន និងមិនត្រូវបានអនុញ្ញាតដើម្បីជួយរក្សាបាននូវទីកន្លែងប្រកបដោយសុវត្ថិភាព។ ក្រុមអ្នកជំនាញផ្នែកគោលនយោបាយរបស់ TikTok មានការទទួលខុសត្រូវចំពោះការវាយតម្លៃគោលការណ៍ណែនាំទាំងនេះជាបន្ដបន្ទាប់ដើម្បីពិចារណាថា តើ TikTok អាចដាក់ឱ្យដំណើរការនូវមាតិកាបែបច្នៃប្រឌិតដោយរបៀបណា ខណៈទប់ស្កាត់បញ្ហាប្រឈមដែលអាចកើតឡើង។
ក្រុមអ្នកជំនាញទាំងនោះជាអ្នកឯកទេសលើមុខជំនាញដ៏ពិតប្រាកដ ដែលអ្នកខ្លះមានជំនាញធ្វើកិច្ចការលើឧស្សាហកម្មបច្ចេកវិទ្យា ហើយអ្នកខ្លះទៀតអាចមកចូលរួមជាមួយក្រុមការងារ TikTok ពីអង្គការសង្គមស៊ីវិល ឬរដ្ឋាភិបាល។ តួនាទីរបស់ពួកគេទាក់ទងនឹងការដោះស្រាយបញ្ហាស្មុគស្មាញ និងលំបាកៗ ដូចជា ថាតើគួរគូសបន្ទាត់លើមាតិកាពាក់ព័ន្ធនឹងជំងឺអប្រក្រតីភាពនៃការទទួលទានអាហារនៅឯណា។
Kyu Kyu Thein បានថ្លែងថា៖ «ចំពោះកិច្ចសហការជាមួយអ្នកជំនាញមកពីខាងក្រៅ យើងដឹងថា មតិកាទាក់ទងនឹងអប្រក្រតីភាពនៃការទទួលទានអាហារ អាចបង្កផលប៉ះពាល់ តែគួរឱ្យកត់សម្គាល់ថា មាតិកា ដែលផ្ដោតលើដំណោះស្រាយក្នុងការព្យាបាលអាការនេះអាចផ្ដល់ផលវិជ្ជមាន ហើយពេលយើងកែសម្រួលគោលនយោបាយរបស់យើង វាពិតជាសំខាន់ណាស់ ដែលយើងបន្ដគិតគូរដល់បញ្ហាខុសប្លែកតិចតួចផ្សេងៗ ដូចជា បញ្ហានេះជាដើម»។
ការស្វែងរកឱ្យឃើញនូវបញ្ហាដែលអាចកើតមាន និងការអនុវត្ដគោលនយោបាយ
ក្រុមការងារផលិតផល និងអនុវត្ដ (Product and Process) បានផ្ដោតលើការចងក្រងយុទ្ធសាស្ដ្រ និងទិចនិកក្នុងការស្វែងរកឱ្យឃើញនូវបញ្ហាដែលអាចកើតមានឱ្យកាន់តែមានប្រសិទ្ធភាព និងអនុវត្ដគោលការណ៍ណែនាំរបស់ TikTok ជាបន្ទាន់។ TikTok ប្រើប្រាស់បច្ចេកវិទ្យា «គណនាស្វ័យប្រវត្ដិ» ដើម្បីបង្កើតជាមុខងារកំណត់សម្គាល់រូបភាព ឬវីដេអូលើប្រព័ន្ធឌីជីថលដ៏វិសេស។ ស្របតាមស្ដង់ដាឧស្សាហកម្ម វាអាចឱ្យ TikTok កត់សម្គាល់ឃើញពីកត្ដាបង្កផលប៉ះពាល់ក្នុងមាតិកាណាដែលបានបំពានគោលនយោបាយសុវត្ថិភាព និងកាន់តែងាយស្រួលក្នុងការលុបវាចោលភ្លាមៗ។
ឧបមាថា បើមតិកាត្រូវបានលុបចោលដោយសារបំពានគោលនយោបាយរបស់ TikTok ដែលទប់ស្កាត់ការចែករំលែករូបភាពកេងប្រវ័ញ្ចផ្លូវភេទកុមារ មុខងារកំណត់សម្គាល់ឌីជីថលដ៏វិសេសនេះ នឹងជួយស្វែងរក និងលុបចោលនូវមាតិកាប្រភេទនោះ ក៏ដូចជារារាំងការបង្ហោះចូលដដែលៗ។ https://newsroom.tiktok.com/km-kh/transparency-center
ខណៈបច្ចេកវិទ្យាអាចជួយលុបរូបភាព ឬវីដេអូល្មើសដែលបង្ហាញឱ្យឃើញច្បាស់ ផ្នែកសំខាន់នៃការកែសម្រួលមាតិកាគឺជាកិច្ចការរបស់មនុស្សដែលត្រូវត្រួតពិនិត្យបន្ថែម។ មិនថាពេលវេលាណា បើមតិកាមួយណាត្រូវបានរាយការណ៍ ក្រុមការងាររបស់ TikTok ត្រៀមខ្លួនជួយចាត់វិធានការជានិច្ច។ តាមរយៈការខិតខំខ្នះខ្នែងបន្ថែមពីការត្រួតពិនិត្យរបស់មនុស្ស TikTok ក៏អាចធ្វើឱ្យប្រសើរឡើងនូវប្រព័ន្ធវិភាគរកដំណោះស្រាយស្វ័យប្រវត្ដិ ខណៈអ្នកត្រួតពិនិត្យផ្ដល់ការឆ្លើយតបទៅកាន់បច្ចេកវិទ្យាវិញ ដោយជួយសម្លឹងមើលដំណើរការនៃចរន្ដមតិកាបង្ហោះឡើងថ្មីៗ និងបង្កើនសមត្ថភាពក្នុងការស្វែងរកឱ្យឃើញមាតិកាល្មើសនាពេលអនាគត។
តួនាទីសំខាន់មួយទៀតនៃក្រុមការងាររបស់ TikTok គឺកំណត់ និងវិភាគមាតិកាដើម្បីបន្ដធ្វើឱ្យប្រសើរឡើងនូវសុក្រឹតភាពនៃដំណើរការកែសម្រួលមាតិកា។ ឧទាហរណ៍ បើវីដេអូណាមួយកំពុងតែមានប្រជាប្រិយភាពខ្លាំង វាអាចត្រូវបានត្រួតពិនិត្យម្ដងទៀតដោយប្រព័ន្ធវិភាគដើម្បីកាត់បន្ថយលទ្ធភាពដែលអាចមានមាតិកាបំពាននៅលើ TikTok។
នាយកគ្រប់គ្រងផ្នែកគោលនយោបាយសាធារណៈនៃក្រុមហ៊ុន TikTok ប្រចាំនៅកម្ពុជា Kyu Kyu Thein បានបន្ដថា៖ «លើសពីនេះ យើងធ្វើការវិភាគលើការសម្រេចកែសម្រួលមាតិកាឱ្យសមស្របដើម្បីដឹងថា មូលហេតុអ្វីបានជាមាតិកាបំពាននោះអាចមិនត្រូវបានចាប់កំហុសតាំងពីដើមដំបូង និងរកឱ្យឃើញដំណើរទំនងដែលវិវត្ដឱ្យមានមាតិកាល្មើសនៅលើប្លេតហ្វមរបស់យើង។ ជាក់ស្ដែង យើងប្រហែលជាដឹងថា យើងត្រូវធ្វើកិច្ចការបន្ថែមទៀតដើម្បីអភិវឌ្ឍបច្ចេកវិទ្យាស្វែងរកឱ្យឃើញនូវលទ្ធភាពបង្កជាមាតិកាល្មើសមួយចំនួនដោយស្វ័យប្រវត្ដិ។ ម្យ៉ាងវិញទៀត យើងយល់ថា យើងគួររៀបចំវគ្គបណ្ដុះបណ្ដាលគោលដៅបន្ថែមសម្រាប់ក្រុមកែសម្រួលមាតិការបស់យើង ដើម្បីជួយជំរុញការយល់ដឹងអំពីគោលនយោបាយ និងភាពខុសគ្នាតិចតួចឱ្យកាន់តែល្អ ក្នុងគោលបំណងធ្វើឱ្យប្រសើរឡើងចំពោះការសម្រេចចិត្ដដ៏ត្រឹមត្រូវអំឡុងពេលធ្វើការត្រួតពិនិត្យ»។
ការផ្ដោតលើសុខុមាលភាពបុគ្គលិក
ការកសាង និងរក្សានូវបទពិសោធសុវត្ថិភាពសម្រាប់សហគមន៍ TikTok គឺជាតួនាទីសំខាន់បំផុតរបស់ក្រុមការងារ TikTok។ នេះមានន័យថា ក្រុមមជ្ឈន្តិក (អ្នកកែសម្រួល) អាចតម្រូវឱ្យធ្វើការត្រួតពិនិត្យមាតិកាដែលអាចបង្កផលប៉ះពាល់ ដោយផ្ដល់ជាមូលដ្ឋានគាំទ្រដ៏ត្រឹមត្រូវ។ TikTok ទទួលស្គាល់កិច្ចការនេះ និងផ្ដោតលើកិច្ចការអាទិភាព ដូចជា បញ្ហាសុខភាព សុវត្ថិភាព និងសុខុមាលភាពបុគ្គលិករបស់ខ្លួន។ TikTok ផ្ដល់ដល់ក្រុមការងារនូវកម្មវិធីសុខុមាលភាព រួមទាំង ការបណ្ដុះបណ្ដាល ការគាំពារសុខភាព និងការប្រឹក្សាវិជ្ជាជីវៈ។ លើសពីនេះ ប្លេតហ្វមវីដេអូខ្លីៗដ៏ល្បីល្បាញនេះ ធ្វើការវិភាគជាប្រចាំដើម្បីស្វែងយល់ថា តើ TikTok អាចបន្ដធ្វើឱ្យប្រសើរឡើងដោយរបៀបណា ហើយ TikTok រំពឹងថានឹងឈានមុខគេក្នុងឧស្សាហកម្មនេះតាមរយៈការផ្ដល់នូវរចនាសម្ព័ន្ធគាំទ្រប្រកបដោយវិសាលភាព និងប្រសិទ្ធភាពដ៏ធំធេងដល់បុគ្គលិក TikTok។
Kyu Kyu Thein បានបញ្ជាក់ថា៖ «ខណៈយើងបន្ដដំណើរជួយអភិវឌ្ឍ TikTok ជាទីកន្លែងប្រកបដោយសុវត្ថិភាព ដែលផ្ដល់ទាំងភាពសប្បាយរីករាយ និងភាពច្នៃប្រឌិត យើងត្រៀមខ្លួនជាស្រេចក្នុងការចែករំលែកបន្ថែមទៀតអំពីកិច្ចការរបស់ក្រុមការងារផ្នែកជំនឿចិត្ដ និងសុវត្ថិភាព (Trust and Safety)»៕
