ក្រុមយុវជន Global Shaper Phnom Penh Hub សហការជាមួយអង្គភាព Teach for Cambodia បានរៀបចំកម្មវិធី «Riel Hackathon for Kids 2023» នៅថ្ងៃទី ១៧ ខែ កញ្ញា ឆ្នាំ២០២៣ បានយ៉ាងជោគជ័យ។ ដោយកម្មវិធីនេះ គឺជាអនុវត្តគម្រោងដំណាក់កាលទីពីរនៃ គម្រោង «Financial Education/ Literacy» ដោយដំណាក់កាលទី១ ត្រូវបានអនុវត្តដោយជោគជ័យកាលពីខែសីហាកន្លងទៅនេះ ដោយអង្គភាព Teach for Cambodia (TFC) ។
កាលពីដំណាក់ទី១ សិស្សប្រមាណជាង ៤០០០ នាក់ មកពីសាលាបឋមសិក្សាផ្សេងៗ ក្នុងខេត្តកណ្តាល និងទីក្រុងភ្នំពេញ ត្រូវបានទទួលការបណ្តុះបណ្តាលអំពី ផែនការហិរញ្ញវត្ថុ គោលដៅជីវិត ក្នុងរយៈពេលជាង ៧ ខែ ចាប់ពីខែកុម្ភៈ ដល់ខែសីហា។ ហើយសម្រាប់ក្រុមសិស្សដែលត្រូវបានជ្រើសរើសចូលក្នុងវគ្គទី២ នឹងទទួលបានទឹកប្រាក់ចំនួន ២០,០០០ រៀល ដើម្បីយកទៅបង្កើតគំនិតអាជីវកម្មមួយ ហើយត្រូវបានទទួលការប្រឹក្សាយោគបល់ពីសំណាក់ Coach ដែលមានបទពិសោធន៍ក្នុងការធ្វើអាជីវកម្មផ្សេងៗចំនួន០២ សប្តាហ៍។
ក្រោយពីទទួលបានការប្រឹក្សាយោគបល់ និងពិសោធន៍គំនិតអាជីវកម្មរួចហើយ ទើបចុងក្រោយក្រុមសិស្សទាំងអស់បានយកគំនិតអាជីវកម្មរបស់ខ្លួននីមួយៗដែលបានសម្រិតសម្រាំងហើយ មកធ្វើបទបង្ហាញនៅថ្ងៃកម្មវិធី «Riel Hackathon for Kids 2023» ដែលប្រព្រឹត្តិទៅនៅថ្ងៃទី ១៧ ខែ កញ្ញា ឆ្នាំ២០២៣។
