ហើយកន្លងមក នាយដ្ឋានប្រឆាំងបទល្មើសបច្ចេកវិទ្យា ក៏បានប្រកាសឱ្យជនរងគ្រោះពីការបោកប្រាស់នៅលើអនឡាញ អាចដាក់ពាក្យបណ្ដឹងបាន ដោយអនុវត្តតាមជំហានទាំងនេះ ទី១ ត្រូវបំពពេញពាក្យបណ្ដឹង ដែលលោកអ្នកអាចទាញយកពីតំណភ្ជាប់ https://bit.ly/ACCPKH។ ទី២ ភ្ជាប់មកជាមួយនូវ អត្តសញ្ញាណប័ណ្ណ ឬសំបុត្រកំណើត ឬលិខិតឆ្លងដែន និងសូមថតរូបផ្ទាល់ជាមួយឯកសារនេះ និង ទី៣ សូមភ្ជាប់មកជាមួយនូវរូបភាព Screenshot ទាក់ទងនឹងការបោកបញ្ឆោត។ 

ជាករណីជាក់ស្ដែង ថ្មីៗនេះ Technology Cambodia បានសម្ភាសន៍ជាមួយនឹងលោក សុខា ផានិត្យ ដែលជាអ្នកឯកទេសអភិវឌ្ឍន៍ការចាប់ផ្តើមអាជីវកម្មជាន់ខ្ពស់ នៃមឌ្ឍមណ្ឌលបណ្ដុះបណ្ដាលធុរកិច្ចថ្មី “តេជោ” បានឱ្យដឹងថា លោកត្រូវបានជនខិលខូច យកឈ្មោះ និងរូបភាពរបស់លោក ទៅដើរឆបោកនៅលើអនឡាញ ដោយបានបង្កើតក្រុម Telegram ឈ្មោះថា «🇰🇭 Payeer ទេសកម្ពុជា 🇰🇭» និងបានប្រើឈ្មោះក៏ដូចជារូបភាពរបស់លោក ដើរតួរធ្វើជាមេក្រុម ហើយបាននិយាយបញ្ចុះបញ្ចូលជំរុញឱ្យសមាជិកក្នុងក្រុមដែលជាជនរងគ្រោះ ធ្វើការវិនិយោគ ដាក់លុយជាកញ្ចប់បានលុយត្រឡប់ទៅវិញទ្វេរគុណ ដាក់ ៥០០០ដុល្លារ បានវិញ ១៥០០០ដុល្លារ និងមានការធានាត្រឹមត្រូវ។

ជាដំណោះស្រាយចំពោះបញ្ហាខាងលើ ភ្លាមៗ លោក សុខា ផានិត្យ បានធ្វើការថតទុកនូវរាល់ផស្ដុតាងដែលជនខិលខូចbanយកឈ្មោះនិងរូបរបស់លោក យកទៅប្រើបោកប្រាស់អ្នកដទៃ។ ហើយលោកបានបង្ហោះរូបភាពភស្ដុតាងទាំងអស់នោះ នៅលើបណ្ដាសង្គមហ្វេសប៊ុកផ្ទាល់ខ្លួនរបស់លោក ប្រកាសឱ្យមហាជនទូទៅបានដឹង និងមានការប្រុងប្រយ័ត្នចំពោះករណីឆបោកបែបនេះ។

លោកបានបន្ដទៀតថា លោកក៏បានធ្វើការទាក់ទងទៅកាន់ដែនសមត្ថកិច្ចរួមមាននា យកដ្ឋានប្រឆាំងបទល្មើសបច្ចេកវិទ្យា និងក្រសួងមហាផ្ទៃ ដើម្បីរាយការណ៍ពីបញ្ហាមួយនេះ។ លើសពីនេះទៅទៀត លោកក៏បានទាក់ទងទៅកាន់ខាងមេធាវីដើម្បីទទួលបានការប្រឹក្សារកដំណោះស្រាយ ហើយខាងមេធាវីក៏បានចេញលិខិតបញ្ជាក់ថា លោកពិតជាមិនបានជាប់ពាក់ព័ន្ធទៅនឹងបញ្ហាឆបោកមួយនេះពិតប្រាកដមែន។

ជាមួយគ្នានេះដែរ លោក សុខា ផានិត្យ ក៏បានយកលិខិតមួយនេះ បូកជាមួយនឹងផស្ដុតាងផ្សេងៗ ទៅកាន់នាយកដ្ឋានប្រឆាំងបទស្មើសបច្ចេកវិទ្យាបន្ថែមដើម្បីដាក់ពាក្យបណ្ដឹង។ លោកបន្ថែមទៀតថា មូលហេតុដែលយើងត្រូវដាក់ពាក្យបណ្ដឹងទៅកាន់ដែនសមត្ថកិច្ចដូច្នេះ គឺដើម្បីឱ្យមានការទទួលស្គាល់ជាអំណះអំណាងពីមន្រ្ដីដែនសមត្ថកិច្ចដើម្បីការពារទុកជាមុន ពីព្រោះយើងមិនដឹងទេថា ការបោកប្រាស់នេះនឹងធ្ងន់ធ្ងរឬទំហំធំ ដល់កម្រិតណា ហើយប្រសិនបើធ្ងន់ធ្ងរ យើងអាចជាមនុស្សដែលមិនដឹងអីបែរជាក្លាយទៅជនជាប់ទោសដោយសារតែគេបានយករូបថត និងឈ្មោះរបស់យើងទៅដើរបោកប្រាស់អ្នកដទៃ។

ជាសារទៅកាន់មហាជន លោក សុខា ផានិត្យ បានសង្កត់ធ្ងន់យ៉ាងដូច្នេះថា បច្ចុប្បន្ននេះ បច្ចេកវិទ្យាកាន់តែទំនើបជាងមុន ដែលធ្វើឱ្យការទំនាក់ទំនងរស់នៅ និងការវិនិយោគរកស៊ីផ្សេងៗ មានការផ្លាស់ប្ដូរយ៉ាងខ្លាំង។ ប៉ុន្ដែយ៉ាងណាក៏ដោយ ស្របពេលជាមួយគ្នានៃភាពរីកចម្រើននេះ ក៏មានការការបោកប្រាស់នៅក្នុងរូបភាពជាច្រើនផងដែរ។ ហេតុនេះ លោកសំណូមពរឱ្យប្រជាជនខ្មែរដែលមានការយល់ដឹងទៅលើបញ្ហានេះ គួរតែចូលរួមចែករំលែកព័ត៌មានក៏ដូចជាចំណោះដឹងទៅកាន់ប្រជាជនខ្មែរទូទាំងប្រទេស ជាពិសេសបងប្អូនខ្មែរដែលរស់នៅតាមបណ្ដាខេត្ត និងទីជនបទដាច់ស្រយាល ឱ្យបានដឹងនិងមានការប្រុងប្រយ័ត្ន។

ទន្ទឹមនឹងនេះ ត្រូវប្រុងប្រយ័ត្នទៅលើការវិនិយោគ ដោយមុនពេលធ្វើការវិនិយោគទៅលើអ្វីមួយ គួរតែចំណាយពេលសិក្សាទៅលើរឿងនោះឱ្យបានច្បាស់ កុំសម្រេចចិត្តវិនិយោគទាំងងងឹតងងល់ ឬវិនិយោគតាមអារម្មណ៍នៃភាពលោភលន់ ស្របពេលដែលបច្ចុប្បន្ននេះ មានការបោកប្រាស់ជាច្រើនរូបភាព។ ជាពិសេសការដាក់លុយបានលុយត្រឡប់ទៅវិញច្រើនៗនេះ គឺមានភាគរយច្រើនណាស់ថាជាការបោកប្រាស់។

ដោយឡែក ចំពោះការវិនិយោគតាមរយៈអនឡាញ មុននឹងធ្វើការវិនិយោគអ្នកគួរតែសិក្សាទៅលើប្រភពនៃវេបសាយ ក៏ដូចជា App ទាំងអស់នោះ ថាមានប្រភពពីណា? អាចទុកចិត្តបានដែរឬអត់? ហើយប្រសិនបើអ្នកមិនច្បាស់ គួរតែពិភាក្សា ជាមួយនឹងអ្នកដែលមានចំណេះដឹង ឬអ្នកជំនាញទៅលើផ្នែកនោះឱ្យបានច្បាស់លាស់។

ហើយជាចុងក្រោយ លោកបានសង្កត់ធ្ងន់ថា សម្រាប់ការវិនិយោគកុំសូវពឹងផ្អែកទៅលើការវិនិយោគតាមអនឡាញខ្លាំងពេក ប៉ុន្ដែគួរតែវិនិយោគជាមួយក្រុមហ៊ុនដែលមានទីតាំងពិតប្រាកដដែលអាចទៅដល់ និងមានចុះបញ្ជីរកស៊ីស្របច្បាប់។ ដោយហេតុថាការវិនិយោដោយពឹងផ្អែកទៅលើអនឡាញសុទ្ធ គឺអាចនឹងមានហានិភ័យច្រើន។ ជាក់ស្ដែ ងដូចជាករណីដែលោក ផានិត្យ ជួបផ្ទាល់គឺគេបានយកឈ្មោះរបស់លោក បង្កើតជាក្រុមលើ Telegram ទៅដើរបោកប្រាស់អ្នកដទៃឱ្យវិនិយោគជាមួយ។ ហើយជាដំណោះស្រាយ យើងគួរតែទៅជួបបុគ្គលនោះផ្ទាល់នៅក្រៅ និងមានកិច្ចសន្យា សំបុត្រស្នាមត្រឹមត្រូវ ទើបអាចទុកចិត្តបានជាង ជាជាងការវិនិយោគតាមអនឡាញទាំងស្រុងដែលមិនបានជួបមនុស្សពិតនៅខាងក្រៅ និងមានក្រដាស់ស្នាមត្រឹមត្រូវ៕

អត្ថបទដោយ៖ ម៉ម ណាវ៉ាសិរិ