ប្រភពដដែលបានឱ្យដឹងទៀតថា មូលហេតុដែលក្រុមហ៊ុន Meta បញ្ឈប់បុគ្គលិកច្រើនដូច្នេះ គឺដើម្បីកាត់បន្ថយចំណាយ និងផ្ដោតលើប្រាក់ចំណេញ ខណៈស្ថានភាពសេដ្ឋកិច្ចកំពុងតែមានការប្រែប្រួល។ ហើយបើតាមលោក Mark Zuckerberg ដែលជា CEO នៃក្រុមហ៊ុន Meta បានលើកឡើងថា ឆ្នាំនេះនឹងក្លាយជា «ឆ្នាំនៃការអនុវត្ត» ដែលក្រុមហ៊ុននឹងចាប់ផ្ដើមរឹតខ្សែក្រវាត់ កាត់បន្ថយចំណាយដែលមិនចាំបាច់ចេញ ផ្ដោតលើប្រាក់ចំណេញ និងរៀបចំការងារក្នុងក្រុមហ៊ុនឱ្យមានសណ្ដាប់ធ្នាប់ និងធ្វើការប្រកបដោយប្រសិទ្ធិភាពខ្ពស់។

ជាមួយគ្នានេះដែរ ក្រៅតែពីការប្រកាសបញ្ឈប់បុគ្គលិកក្រុមហ៊ុន Meta ក៏បានប្រកាសធ្វើការបិទការជួលបុគ្គលិករហូតដល់ទៅ៥០០០នាក់បន្ថែមផងដែរ នៅក្នុងឆ្នាំ២០២៣​នេះ។

គួរជម្រាបផងដែរថា គិតត្រឹមចុងឆ្នាំ ២០២២ រហូតដល់ខែមីនា ឆ្នាំ២០២៣នេះ ក្រុមហ៊ុន Meta បានប្រកាសបញ្ឈប់បុគ្គលិកសរុបអស់ប្រមាណ ២១០០០នាក់រួចហើយ ដើម្បីរៀបចំសម្រួលប្រតិបត្តិការណ៍ក្រុមហ៊ុនឡើងវិញ។ យ៉ាងណាមិញ សម្រាប់ការប្រកាសបញ្ឈប់បុគ្គលិក១០០០០នាក់ កាលពីពេលថ្មីៗនេះ បានធ្វើឱ្យតម្លៃហ៊ុនរបស់ក្រុមហ៊ុន Meta ឡើងថ្លៃ៧%ផងដែរ៕