Impossible food គឺជាក្រុមហ៊ុនផលិតចំណីអាហារសិប្បនិម្មិតដែលបានច្នៃធ្វើសាច់គោចេញពីបន្លែបានដោយជោគជ័យកាលពីឆ្នាំ២០១៩ កន្លងទៅ។ បន្ទាប់ពីជោគជ័យលើគម្រោងច្នៃសាច់គោចេញពីបន្លែនេះហើយ ក្រុមហ៊ុនក៏កំពុងតែធ្វើការស្រាវជ្រាចយ៉ាងមមាញឹកទៅលើការងារថ្មីមួយទៀតគឺ សាច់មាន់ សាច់ជ្រូក និង សាច់ត្រី សិប្បនិម្មិត។ នេះបើយោងតាមការចុះផ្សាយរបស់សារព៍ត៏មាន Futurism។
លោក Patrick Brown ដែលជាសា្ថបនិករបស់ក្រុមហ៊ុន Impossible food បានមានប្រសាសន៍ថា ច្នៃធ្វើសាច់គោចេញពីបន្លែរបស់ក្រុមហ៊ុនលោកកំពុងតែរីកចម្រើនយ៉ាងខ្លាំង ហើយវានិងកាន់តែប្រសើរប្រសិនបើនៅឆ្នាំ២០៣៥ ខាងមុខមនុស្សឆប់សម្លាប់សត្វដើម្បីយកមកធ្វើជាអាហារ។ លោកបានបន្ថែមទៀតថា « បេសកកម្មរបស់ក្រុមហ៊ុនយើងគឺចង់ឲ្យចំណីអាហារបច្ចេកវិទ្យាទៅជំនួសសាច់សត្វមានជីវិតនៅឆ្នាំ ២០៣៥» ។
មូលហេតុចម្បងមួយដែលធ្វើឲ្យលោក Patrick Brown ទាញថាមនុស្សអាចនិងឈប់បរិភោគសាច់សត្វមានជីវិតនៅឆ្នាំ២០៣៥ ខាងមុខព្រោះលោកមើលឃើញពី ការបំពុលបរិស្ថាន និងបម្រែបម្រួលអាកាសធាតុនាពេលបច្ចុប្បន្នដែលអាចនិងប៉ះពាល់ដល់ ការរស់នៅរបស់ហ្វូងសត្វនាពេលអនាគត។ យ៉ាងណាមិញ ការផ្លាស់ប្តូនូវរបៀបរស់នៅថ្មីបែបនេះ និងទទួលបានជោគជ័យ ឬយ៉ាងណានោះយើងទាំងអស់គ្នានៅមិនទាន់ដឹងនោះទេ។
គូសបញ្ជាក់ថា សន្ទុះនៃការគាំទ្រ សាច់គោចេញពីបន្លែរបស់ Impossible food បើគិតត្រឹមឆ្នាំ២០២០ ទទួលបានការវិនិយោគប្រមាណជា ២៨៧.៥លានដុល្លារ ជាមួយនឹងការបញ្ជារទិញពីភោជនីយដ្ឋានច្រើនជាង ៥ពាន់កន្លែងជារៀងរាល់ថ្ងៃ ដូច្នេះប្រសិនបើការទស្សន៍ទាយរបស់លោក Patrick Brownក្លាយជាការពិតនោះ ពិភពលោកយើងនិងកាន់តែមានការរីកចម្រើនខាងបច្ចេកវិទ្យាជាក់ជាមិនខាន៕
