យ៉ាងណាមិញ មានអ្នកប្រើប្រាស់ Telegram ជាច្រើននៅកម្ពុជា បានឆ្ងល់ថា មិនដែលឃើញពាណិជ្ជកម្មលើ Telegram ​ និងឱ្យប្រើប្រាស់ហ្វ្រី តើ Telegram បានចំណូលមកពីណាសម្រាប់យកទៅដំណើរការក្រុមហ៊ុន?

បើតាមការចុះផ្សាយរបស់គេហទំព័រ Feedough បានឱ្យដឹងថា បណ្ដាញសង្គមយក្សមួយនេះគឺមិនបានរកចំណូលពីការផ្សាយពាណិជ្ជកម្ម ឬការគិតថ្លៃពីអ្នកប្រើប្រាស់នោះទេ ព្រោះបណ្ដាញសង្គមមួយនេះបានបង្កើតឡើងដំបូងឡើយក្នុងគោលដៅជាអំណោយសប្បុរសដ៏មានតម្លៃមួយសម្រាប់មហាជនតែប៉ុណ្ណោះ។

យ៉ាងណាមិញ បណ្ដាញសង្គមយក្សមួយនេះ គឺ​រកចំណូលបានពីការបរិច្ចាគ របស់មហាជន និងស្ថាប័នធំៗផ្សេងៗជាច្រើនដែលប្រើប្រាស់ Telegram ហើយបណ្ដាញសង្គម Telegram ក៏នឹងធ្វើការរៃអង្គាសប្រាក់ពីស្ថាប័នធំៗមួយចំនួនផងដែរនៅក្នុងករណីត្រូវការចាំបាច់ណាមួយ។ មួយវិញទៀត ធនធានដែល Telegram ប្រើដើម្បីចិញ្ចឹមអាជីវកម្មរបស់ខ្លួនភាគច្រើនគឺបានមកពីទុនរបស់អ្នកវិនិយោគផ្សេងៗតែប៉ុណ្ណោះ។

បើតាមប្រសាសន៍របស់ស្ថាបនិករបស់ Telegram បានឲ្យដឹងថា គោលដៅនៃការបង្កើត Telegram នេះ គឺចង់បម្រើដល់មនុស្សលោកក្នុងន័យសប្បុរធម៌ច្រើនជាង។ ប៉ុន្តែទោះបីជាយ៉ាងណាក៏ដោយ កាកររស់ដោយពឹងលើការបរិច្ចាគពីគេ ប្រហែលជាមិនអាចធ្វើឱ្យ Telegram អាចរីកចម្រើនបានយូរអង្វែងទៅ អនាគតនោះទេ ហេតុនេះ Telegram កាលពីឆ្នាំ២០២១ កន្លងទៅថ្មីៗនេះ Telegram បានគិតគូរពីគម្រោង ផ្លាស់ប្ដូរនូវទម្រង់អាជីវកម្មរបស់ខ្លួនមួយចំនួនទាក់ទងនឹងការចង់ទាញយកចំណូលពីការផ្សាយពាណិជ្ជកម្ម តាមរយៈការផ្សាយពាណិជ្ជកម្មនៅតាម Group និងតាមឆានែលធំៗដែលមានសមាជិកច្រើន។ 

ជាក់ស្ដែង មានឆានែលមួយចំនួនមានអ្នកសមាជិករហូតដល់ទៅរាប់លាននាក់ ហើយបើគេគិតឆានែលធំៗចំនួន ១០តែប៉ុណ្ណោះ គឺមានសមាជិករហូតដល់ទៅ ១២០លាននាក់ ដែលនេះជាប្រភពចំណូលដ៏ធំមួយសម្រាប់ Telegram នៅពេលដែលគម្រោងចាប់ផ្ដើមផ្សាយពាណិជ្ជកម្មចាប់ផ្ដើមដំណើរការ។

ទន្ទឹមនឹងនេះដែរ ថ្នាក់ដឹកនាំ Telegram ក៏បានបញ្ជាក់ផងដែរថា ប្រសិនបើ Telegram សម្រេចចិត្តផ្សព្វផ្សាយពាណិជ្ជកម្មចូលទៅក្នុង Group និង Chanel ធំៗ ម្ចាស់ Group និង Chanel ទាំងនោះ ក៏នឹងទទួលបានចំណូលខ្លះដែរ។

គួរបញ្ជាក់ផងដែរថា គម្រោងចេញផ្សព្វផ្សាយពាណិជ្ជកម្មនេះគឺកំពុងតែស្ថិតនៅក្នុងការពិចារណាតែប៉ុណ្ណោះ ប៉ុន្តែវាក៏ជាដំណឹងល្អមួយផងដែរសម្រាប់ម្ចាស់ Group និង Chanel ធំៗដែលមានសមាជិកច្រើន ពោលគឺគាត់អាចនឹងទាញចំណូលបាន បើសិនជា Telegram ពិតជាចេញគោលការណ៍ផ្សាយពាណិជ្ជកម្មពិតមែន៕