កាលពីថ្មីៗនេះ អ្នកវិទ្យាសាស្រ្តមកពីសាកលវិទ្យាល័យ University Of Glasgow ទទួលបានភាពជោគជ័យ ទៅលើគម្រោងស្រាវជ្រាវបច្ចេកវិទ្យា Aerohaptic Holograms ដែលអាចខលទាក់ទងជាមួយនឹងអ្នកវិទ្យាសាស្រ្ដដែលទៅស្រាវជ្រាវនៅក្រៅភព ជាទម្រង់វីដេអូខលបែប Hologram ឃើញគ្នាបែប 3D ដូចមនុស្សនៅនឹងមុខ និងអាចចាប់ដៃគ្នាទទួលអារម្មណ៍ដូចចាប់ដៃមនុស្សនៅក្រៅពិតៗ។ នេះបើយោងតាមការចុះផ្សាយរបស់សារព័ត៌មាន Futurism។
ប្រភពដដែលបានបន្តថា ដើម្បីខលតាមរយៈបច្ចេកវិទ្យា «Aerohaptic Holograms» នេះបានគេត្រូវប្រើ ឧបករណ៍ម្យ៉ាងដែលមានឈ្មោះថា «Multimodal Acoustic Trap Display» សម្រាប់បង្ហាញរូបភាព Hologram អាចខលឃើញគ្នាជាទម្រង់ 3D ដូចមនុស្សនៅនឹងមុខ បូករួមនឹងបច្ចេកវិទ្យា «Aerohaptics» ដែលអាចជួយឱ្យគេអាចទទួលបានអារម្មណ៍ដូចចាប់ដៃមនុស្សនៅក្រៅពិតៗ។
ជាមួយគ្នានេះដែរ សម្រាប់បច្ចេកវិទ្យានេះ គេអាចប្រើសម្រាប់ទាក់ទងក្រុមអាវកាសយាននិក ដែលចេញទៅស្រាវជ្រាវនៅក្រៅភព ដូចជាទៅភពអង្គារ ឬភពព្រះចន្ទជាដើម។
គូសបញ្ជាក់ថា សម្រាប់បច្ចេវិទ្យា Aerohaptic Holograms នេះគេមិនទាន់ដាក់ឱ្យប្រើប្រាស់ទូលំទូលាយនៅឡើយទេ ប៉ុន្ដែការរកឃើញនេះ គឺជារបកគំហើញដ៏អស្ចារ្យមួយ ដែលមានប្រយោជន៍ខ្លាំងចំពោះការស្រាវជ្រាវ និងធ្វើឱ្យអនាគតនៃការទំនាក់ទំនងរបស់មនុស្សជាតិកាន់តែមានភាពទំនើបខ្លាំងទៅមុខមួយកម្រិតទៀត៕
អត្ថបទដោយ៖ អូន រ៉ាទី
