ជាក់ស្ដែង កាលពីថ្ងៃចន្ទ ទី១២ ខែធ្នូ ឆ្នាំ២០២២ កន្លងទៅថ្មីនេះ ស្ថាបនិក FTX លោក Sam Bankman-Fried ត្រូវបានចាប់ខ្លួននៅកោះ Bahamas បន្ទាប់ពីសហរដ្ឋអាមេរិកបានចេញដីការចាប់ខ្លួនពីបន្ទុកបទព្រហ្មទណ្ឌ។ នេះបើតាមការចុះផ្សាយរបស់សារព័ត៌មាន CNBC។

ប្រភពដដែលបានឱ្យដឹងថា ការឃាត់ខ្លួនលោក Sam Bankman-Fried គឺជាវិធានការដំបូងដែលនិយ័តករអាមេរិកអនុវត្តន៍ ដើម្បីឱ្យមានការទទួលខុសត្រូវទៅលើជនរកគ្រោះជាច្រើនរូបដែលជួបការខាតបង់រាប់លានដុល្លារ ដោយសារតែ​ FTX កាលពីខែមុន។

គួរជម្រាបផងដែរថា ក្រុមហ៊ុន FTX ត្រូវបានប្រកាសក្ស័យធន ក្រោយពីមានមនុស្សជាច្រើននាំគ្នាសម្រុកទៅដកលុយចេញពី FTX និងនាំគ្នាសម្រុកលក់កាក់ FTX Coin ចេញដែលធ្វើឱ្យតម្លៃកាក់ និងតម្លៃក្រុមហ៊ុនធ្លាក់ចុះយ៉ាងគំហុក។ ហើយដោយសារតែចំនួនទឹកលុយមានទំហំធំ និងមិនមានលុយបង្វិលទាន់ បូករួមនៃការធ្លាក់ចុះនៃតម្លៃក្រុមហ៊ុនផងនោះ ជាហេតុធ្វើឱ្យលោក Sam Bankman-Fried ត្រូវបង្ខំចិត្តដាក់ពាក្យក្ស័យធននៅទីបំផុត។ យ៉ាងណាក៏ដោយ លោក Sam Bankman-Fried ត្រូវបានគេរំពឹងថា នឹងត្រូវបានធ្វើបត្យាប័នឆាប់ៗ នេះ៕