បើតាមការចុះផ្សាយរបស់គេហទំព័រ The Fortune បានឱ្យដឹងថា សម្រាប់ Caryn AI ដែល Caryn Marjorie បង្កើតឡើងនេះ គឺមានភាពឆ្លាតវៃខ្លាំងអាចធ្វើការឆ្លងឆ្លើយដូចមនុស្សពិតៗ។ ដោយ AI មួយនេះមានភាពឆ្លាតវៃខ្លាំង អាចកំដរអ្នកដែលនៅទំនេរមិនទាន់មានដៃគូរ ដោះស្រាយបញ្ហាឯកាបាន ដោយវាមានសមត្ថភាពអាចឆ្លងឆ្លើយដូចនិយាយជាមួយមនុស្សពិត ខណៈការជជែកលេងជា AI នេះមួយនាទីត្រូវចំណាយលុយមួយដុល្លារ។

ប្រភពដដែលបានឱ្យដឹងទៀតថា សម្រាប់ការបង្កើត Caryn AI នេះក្រុមការងារបស់កញ្ញា Caryn Marjorie បានចំណាយពេលអស់ជាង២០០០ម៉ោងក្នុងបន្ទប់ស្ទូឌីយូ ដើម្បីថតបង្កើតជារូបតំណាង AI ដែលមានមុខមាត់ សំឡេង និងកាយវិកាដែលដូចទៅនឹងកញ្ញា ​  Caryn Marjorie។ បន្ថែមពីនេះទៀត គេក៏បានបញ្ចូល ChatGPT4 បូកជាមួយនឹងកម្មវិធី Telegram ផងដែរ។

គួរជម្រាបផងដែរថា បើតាមកញ្ញា Caryn Marjorie បានឱ្យដឹងថា បច្ចុប្បន្ននេះ ផ្លែតហ្វម​ Caryn AI របស់កញ្ញា Caryn Marjorie ទើបតែដាក់ឱ្យប្រើប្រាស់សាកល្បងក្នុងតំណាក់កាលដំបូង ប៉ុន្ដែមានអ្នក Subcribed ជាង១ម៉ឺននាក់ និងអាចរកចំណូលបាន ៧១៦១០ដុល្លាររួចមកហើយ ខណៈអ្នកប្រើប្រាស់៩៩% ជាមនុស្សប្រុស។ កញ្ញា Caryn Marjorie ជឿថាផ្លែតហ្វមដែលខ្លួនបង្កើតឡើងនេះ នឹងជួយព្យាបាលភាពឯកាបាន។ បន្ថែមពីនេះទៀត នៅពេលដែលផ្លែតហ្វមរបស់ខ្លួនដាក់ឱ្យដំណើរការពេញលេញ កញ្ញា Caryn Marjorie រំពឹងថានឹងមានអ្នកប្រើកាន់តែច្រើន​ ហើយអាចរកចំណូលបានយ៉ាងហោចណាស់៥លានដុល្លារក្នុង១ខែ៕