ប្រភពដដែលបានឲ្យដឹងទៀតថា គោលបំណងសំខាន់នៃកិច្ចប្រជុំនេះគឺពិភាក្សាទៅលើគម្រោងអភិវឌ្ឍ និងលើកកម្ពស់សារមន្ទីរប្រល័យពូជសាសន៍គុកទួលស្លែង ឱ្យក្លាយជាមជ្ឈមណ្ឌលឧត្តមភាពសម្រាប់ការអប់រំសន្តិភាព និងការអប់រំពលរដ្ឋសកល ក៏ដូចជាបង្ហាញថាវាជាកន្លែងសារមន្ទីរបៃតង និងឌីជីថលដ៏ពិសេសមួយ សម្រាប់ទេសចរណ៍ និងការរៀនសូត្រ។ នេះបើតាម KOICA បាននិយាយក្នុងសេចក្ដីថ្លែងការណ៍។

ជាមួយគ្នានេះដែរ នៅក្នុងកិច្ចពិភាក្សានេះ លោក Hyunjun Rho តំណាងឲ្យ KOICA ប្រចាំកម្ពុជា បានធ្វើការស្នើទៅកាន់ក្រសួងវប្បធម៌ និងវិចិត្រសិល្បៈកម្ពុជា (MoCFA) និង​អង្គការ UNESCO ឲ្យមានកិច្ចសហប្រតិបត្តិការជាមួយគ្នា ធ្វើការទៅលើការសរសេរឯកសារទស្សនៈទានគម្រោង Project Concept Paper (PCP) សម្រាប់ស្នើទៅកាន់ KOICA  តាមរយៈក្រុមប្រឹក្សាអភិវឌ្ឍន៍កម្ពុជា ជាមួយនឹងក្រសួងការបរទេស និងសហប្រតិបត្តិការអន្តរជាតិកម្ពុជា នៅដើមខែកក្កដា ឆ្នាំ២០២២។

នៅពេលទទួលបាន ឯកសារទស្សនៈទានគម្រោង (PCP) ខាងការិយាល័យ KOICA កម្ពុជានឹងរាយការណ៍ទៅទីស្នាក់ការកណ្តាលរបស់ខ្លួន ដើម្បីជ្រើសរើសគម្រោងអាទិភាពសម្រាប់អនុវត្តនៅឆ្នាំ ២០២៤។ ហើយប្រសិនបើគម្រោងនេះឆ្លងកាត់ការត្រួតពិនិត្យ និងជ្រើសរើស គម្រោងនេះនឹងត្រូវអភិវឌ្ឍនៅចន្លោះឆ្នាំ២០២៤ និង២០២៨ ជាមួយនឹងកញ្ចប់ថវិកាសរុបចំនួន ២លានដុល្លារអាមេរិក៕

អត្ថបទដោយ៖ អូន រ៉ាទី