តើអ្វីជាទូតសុឆន្ទៈ  ឬ Brand Ambassador (BA)?

ទូតសុឆន្ទៈ ឬ Brand Ambassador បើនិយាយឱ្យងាយយល់ គឺសំដៅទៅលើបុគ្គលទាំងឡាយណាដែល ជាតំណាងក្នុងការផ្សព្វផ្សាយពីផលិតផល ឬសេវាកម្មរបស់ក្រុមហ៊ុនណាមួយ ដើម្បីជំរុញការលក់ និងជំរុញយីហោឱ្យកាន់តែល្បី។ ហើយភាគច្រើន BA គឺជាបុគ្គលល្បី ឬជា Influencer ដែលមានគេស្គាល់ច្រើន ឬអាចជាអ្នកគាំទ្រម៉ាកយីហោមួយខ្លាំងដែលមានឥទ្ធិពលទៅមនុស្សជុំវិញខ្លួន។

តើ Brand Ambassador ជួយអ្វីខ្លះ?

មែនទែនទៅ BA ម្នាក់ អាចជួយទៅលើរឿងជាច្រើនទៅដល់យីហោក្រុមហ៊ុនមួយ ហើយខាងក្រោមនេះ យើងនឹងលើកយកនូវគុណតម្លៃមកត្រឡប់មកកាន់យីហោធំៗមួយចំនួនពី BA៖

១.ជួយឱ្យយីហោល្បីលឿន ទទួលបានទំនុកចិត្តពីមហាជន និងចំណេញពេលវេលា៖

ប្រសិនបើក្រុមហ៊ុនមួយគ្រាន់តែឌីហ្សាញរូប ឬផលិតវីដេអូនិយាយពីគុណសម្បត្តិល្អៗ ពីផលិតផល ឬសេវាកម្មរបស់ខ្លួនហើយផ្សព្វផ្សាយទៅកាន់មហាជន ជួនកាលគឺត្រូវចំណាយពេលយូរនិងចំណាយលុយច្រើន ដើម្បីឱ្យមហាជនបានស្គាល់ និងសម្រេចចិត្តទិញ។ ស្របពេលដែលការជួល BA ដែលជាបុគ្គលល្បី ឬមានឥទ្ធិពលមួយរូបដែលមានគេស្គាល់ច្រើនស្រាប់ ឱ្យមកជួយនិយាយគុណសម្បត្តិល្អៗ ពីផលិតផលឬសេវាកម្ម គឺអាចចាក់ធ្លុះដល់បេះដូងអ្នកមើល ឱ្យទុកចិត្ត និងហ៊ានសម្រេចចិត្តប្រើផលិតផល ឬសេវាកម្មនោះដោយប្រើរយៈពេលខ្លីជាង។

២. ទទួលបានអតិថិជនថ្មី​ និងបង្កើនចំនួននៃ​ការលក់៖

ដូចដែលបានរៀបរាប់ពីខាងដើម BA ភាគច្រើនគឺជាបុគ្គលដែលមានឥទ្ធិពល ឬជាបុគ្គលល្បីដែលមានគេស្គាល់ច្រើននៅក្នុងសង្គម ហេតុនេះ ក្រុមហ៊ុនមួយអាចមានឱកាសទទួលបានអតិថិជនថ្មីជាច្រើននាក់ត្រឡប់មកវិញ ដែលអតិថិជនទាំងនោះ អាចជាអ្នកគាំទ្រ BA ដែលខាងក្រុមហ៊ុនជួលមក ឬក៏ភាសារបស់យុវវ័យសម័យ២០២២ ច្រើនតែនិយាយថា ប្រើតាម Idol។

លើពីនេះ អតិថិជនថ្មីមួយក្រុមទៀត អាចជាក្រុមមនុស្សដែលកំពុងតែចាប់អារម្មណ៍ទៅលើផលិតផលឬសេវាកម្មក្រុមហ៊ុនមួយនោះស្រាប់ ប៉ុន្ដែមិនទាន់សម្រេចចិត្តទិញដោយសារមិនទាន់ទុកចិត្ត ហើយក្រោយពេលដែលឃើញ BA ដែលជាបុគ្គលសាធារណៈល្បីមានការជាប់ពាក់ព័ន្ធតំណាងឱ្យក្រុមហ៊ុនដូច្នេះ វាក៏អាចជាកត្តារុញច្រានមួយឱ្យក្រុមមនុស្សដែលចាប់អារម្មណ៍ស្រាប់ទាំងនៅះ ហ៊ានសម្រេចចិត្តទិញដោយលែងមានការសង្ស័យផងដែរ។

៣.ការនិយាយតមាត់៖

ការនិយាយតមាត់គ្នា គឺជាទីផ្សារដែលមានឥទ្ធិពលបំផុតមួយ ដោយជាទូទៅនៅពេលដែលចង់ទិញរបស់អ្វីមួយ មនុស្សច្រើនតែសួរនៃអ្នកជុំវិញខ្លួន ហើយប្រសិនបើមនុស្សដែលគាត់ស្គាល់ ណែនាំថា ទៅទិញកាសយីហោមួយនេះល្អណាស់សូម្បីតែតារាចម្រៀងម្នាក់នោះក៏ប្រើដែរ ហើយបើមានអ្នកណែនាំបែបដូច្នេះ ឱកាសដែលបុគ្គលមួយរូបនោះទៅទិញកាសមួយនោះ គឺខ្ពស់ខ្លាំងណាស់ ព្រោះគាត់ជឿជាក់លើបទពិសោធន៍មនុស្សដែលគាត់ស្គាល់ ក៏ដូចជាជឿទុកចិត្តតាមអ្វីតារាចម្រៀងល្បីមួយរូបនោះបញ្ជាក់ផងដែរ។

៤.ជួយឱ្យការបង្កើតមាតិការផ្សព្វផ្សាយកាន់តែសម្បូរបែប៖

ការមាន BA ប្រចាំក្រុមហ៊ុន នឹងជួយឱ្យការបង្កើតមាតិកាផ្សព្វផ្សាយកាន់តែសម្បូរបែប មិនថាតែការផលិតមាតិកាសម្រាប់ផ្សព្វផ្សាយនៅលើអនឡាញឬក៏អហ្វឡាញនោះទេ។ បន្ថែមពីនេះទៀត ការរើស BA ត្រូវជាមួយនឹងផលិតផល ឬសេវាកម្មរបស់អ្នក គឺអាចជួយឱ្យការផលិតមាតិការផ្សព្វផ្សាយរបស់អ្នកកាន់តែចំគោលដៅ ហើយជួនកាលអាចនិយាយបានថាត្រូវចំណេញជាងការចំណាយលុយផលិតមាតិកាធម្មតាថែមទៀតផង។

ផលអវិជ្ជមាននៃទូតសុឆន្ទៈ  ឬ Brand Ambassador (BA)

បញ្ហាធំបំផុតមួយក្នុងការប្រើ BA គឺខាងក្រុមហ៊ុនពិបាកក្នុងការគ្រប់គ្រងពួកគាត់ ហើយប្រសិនបើ BA ដែលគាត់ជួលមកមានបញ្ហា ឬប្រព្រឹត្ត ដែលនាំឱ្យកើតមានរឿងអាស្រូវ ក្នុងករណីខ្លះវាក៏អាចជះឥទ្ធិពលអវិជ្ជមានត្រឡប់មកកាន់យីហោផងដែរ។ ហេតុនេះ មុននឹងសម្រេចចិត្តរើសនរណាម្នាក់ធ្វើ BA ម្ចាស់យីហោត្រូវតែជ្រើសរើសដោយការប្រុងប្រយ័ត្ន។

គួរជម្រាបផងដែរថា ការប្រើប្រាស់ ទូតសុឆន្ទៈ ឬ Brand Ambassador (BA)​ នៅក្នុងការធ្វើទីផ្សារ គឺមានតាក់តិច របៀបគិត និងយុទ្ធសាស្រ្ដជាច្រើននៅក្នុងនោះ៕

ប្រភព៖ influencer marketing hub, Crew Fire

អត្ថបទដោយ៖ Nava Siri