យ៉ាងណាក៏ដោយ ទោះបីជាវត្តមានរបស់បច្ចេកវិទ្យា AI បានចូលរួមមកដោះស្រាយបញ្ហាមួយចំនួន និងធ្វើ​ឱ្យជីវិតប្រចាំថ្ងៃរបស់មនុស្សកាន់តែទំនើបជាងមុនក៏ពិតមែន ប៉ុន្ដែ AI ក៏អាចក្លាយជាអ្នកដែលដណ្ដើមការងារមួយចំនួនរបស់មនុស្សផងដែរ។ ហើយខាងក្រោយនេះ គឺជាការងារទាំង៥ ដែលអាចនឹងបាត់បង់នៅក្នុងរយៈពេល ១០ឆ្នាំខាងមុខនេះ ដោយសារតែ AI៖

១.ការងាររោងចក្រ​៖ អ្នកធ្វើការរោងចក្រ អាចប្រឈមមុខជាមួយនឹងការបាត់បង់ការងារ ខណៈវត្តមានរបស់ AI អាចធ្វើការបានដូចមនុស្ស និងអាចបញ្ជាឱ្យធ្វើការ២៤ម៉ោង លើ២៤ម៉ោងបាន ដោយមិនចេះតវ៉ា។ ឧទាហរណ៍ជាក់ស្ដែង គឺរោងចក្រផលិតរថយន្ដរបស់មហាសេដ្ឋីលេខ១ ពិភពលោក Elon Musk ត្រូវបានដាក់ឱ្យដំណើរការដោយម៉ាស៊ីនរ៉ូបូត AI ទំនើបៗសុទ្ធតែម្ដង។ ហើយប្រសិនបើទៅថ្ងៃអនាគត ទំនោរនៃការបើករោងចក្រដោយប្រើរ៉ូបូត AI នេះកាន់តែកើនឡើងនោះ មានន័យថា អ្នកធ្វើការរោងចក្រជាច្រើ អាចនឹងប្រឈមជាមួយនឹងការបាត់បង់ការងារ។ នេះបើតាមការចុះផ្សាយរបស់គេហទំព័រ Forbes។

២.ការងារដឹកជញ្ជូនទំនិញ និងអ្នកបើករថយន្ដ៖ បច្ចុប្បន្ននេះ ក្រុមហ៊ុនផ្សារអេឡិចត្រូនិច (E-Commerce) ធំៗ ដែលត្រូវលក់ទំនិញចេញរាប់លានមុខដូចជា Amazon ជាដើមនោះ បាននឹងកំពុងតែវិនិយោគរាប់លានដុល្លារ ទៅលើការបង្កើតនូវប្រព័ន្ធស្វ័យប្រវត្តិកម្មរ៉ូបូត ជាមួយនឹង​ AI ប្រើនៅក្នុងភស្ដុភារកម្មរបស់ខ្លួន ដែលអាចបញ្ជូនទំនិញទៅដល់អតិថិជន ទៅតាម Google Map ដែលបានកំណត់ទីតាំងអាស័យដ្ឋានផ្ទះរបស់អតិថិជនដែលជាទិសដៅត្រូវបញ្ជូនទំនិញទៅ។ បន្ថែមពីនេះទៀត បច្ចុប្បន្ននេះ សម្រាប់ក្រុមហ៊ុន Tesla ក៏បាននឹងកំពុងតែព្យាយាមផលិតឡានអគ្គិសនី (Self-Drive) ដែលអាចបើកបរដោយខ្លួនឯងដោយស្វ័យប្រវត្តិ ទៅតាម Google Map។ ការរួមបញ្ចូលនៃបច្ចេកវិទ្យាទាំងពីរនេះ អនាគតអាចនឹងមកដណ្ដើមការងាររបស់អ្នកដឹកជញ្ជូន និងតៃកុងបើករថយន្ដបាន។​ ប៉ុន្ដែយ៉ាងណាក៏ដោយ ទំនោរមួយនេះទំនងជានឹងមិនកើតឡើងក្នុងប្រទេសកម្ពុជាឆាប់ៗនោះទេ។

៣. ការងារបម្រើសេវាកម្មអនឡាញ (Customer Services)៖ ប្រសិនបើអ្នកធ្លាក់ទិញទំនិញ ឬចូលប្រើវេបសាយណាមួយ អ្នកប្រហែលជាធ្លាប់ប្រទះភ្នែកពី​ AI Chatbot តូចមួយដែលនៅជ្រុកខាងស្នាំផ្នែកខាងក្រោមនៃវេបសាយ លោតមកចាំជួយអ្នកនៅពេលអ្នកមានចម្ងល់ផ្សេងៗ ពីផលិតផល ឬសេវាកម្ម ក៏ដូចជាបញ្ហាផ្សេងៗ ដែលអ្នកជួប។ ដោយបច្ចុប្បន្ន បច្ចេកវិទ្យា AI Chatbot កាន់តែមានភាពឆ្លាតវៃខ្លាំងឡើងៗ ដោយវាអាចឆ្លើយនូវសំណួរ របស់អតិថិជនបានយ៉ាងល្អថែមទៀតផង។ ហេតុនេះទៅថ្ងៃអនាគត AI Chatbot អាចនឹងដណ្ដើមការងារបម្រើសេវាកម្មពីមនុស្សបាន។

៤.បុគ្គលិកគិតលុយក្នុងម៉ាតឬហាងលក់ទំនិញ៖ បច្ចុប្បន្ននេះ ក្នុងម៉ាត ក៏ដូចជាហាងលក់ទំនិញនៅក្នុងប្រទេសមួយចំនួន ចាប់ផ្ដើមងាកទៅប្រើប្រាស់ទូ និងធ្នើដាក់តាំងទំនិញបច្ចេកវិទ្យា​ AI សុទ្ធដែលអនុញ្ញាតឱ្យអតិថិជនអាចចុច និងធ្វើការបញ្ជាទិញភ្លាមៗ អាហារ ផ្លែឈើឬ ភេសជ្ជៈ ហើយអាចធ្វើការបង់លុយភ្លាមៗ បានយ៉ាងងាយស្រួល ដោយមិនចាំបាច់មានមនុស្សចាំគិតលុយដូចមុននោះឡើយ។

៥.សន្ដិសុខ៖ សន្ដិសុខដើរតួនាទីយ៉ាងសំខាន់ក្នុងការការពារសុវត្ថិភាព ប៉ុន្ដែយ៉ាងណាក៏ដោយ តាមរយៈបច្ចេកវិទ្យា AI វាអាចធ្វើការចាប់មុខ និងអាចតាមដានវិភាគទៅលើកាយវិកា ក៏ដូចជាសកម្មភាពផ្សេងៗ របស់មនុស្សបានតាមរយៈការមេរ៉ាសុវត្ថិភាព និងឧបរកណ៍ផ្សេងៗទៀត។ បន្ថែមពីនេះទៀត ប្រសិនបើវាសង្កេតឃើញថា មានសកម្មភាពមិនប្រក្រតី នោះ AI នឹងជូនដំណឹងទៅកាន់ពលីសភ្លាមៗ តែម្ដង។

គួរជម្រាបផងដែរថា ការងារដែលបានរៀបរាប់ខាងលើទំនងជាអាចនឹងបាត់បង់ដោយសារតែ AI ប៉ុន្ដែយ៉ាងណាក៏ដោយទំនោរនៃការផ្លាស់ប្ដូរនេះ សម្រាប់ការងារមួយចំនួនអាចនឹងមិនទាន់កើតមានចំពោះប្រទេសកម្ពុជាយើងភ្លាមៗ ឬត្រឹមរយៈពេល១០ឆ្នាំនោះទេ។ ប៉ុន្ដែយ៉ាងណាក៏ដោយ អ្វីដែលអ្នកគួរធ្វើគឺគួរតែតាមដានឱ្យដឹងពីការវិវត្តន៍នៃបច្ចេកវិទ្យា ថាតើអ្វីជាផលប៉ះពាល់? ហើយតើយើងអាចទាញប្រយោជន៍អ្វីខ្លះបានពីបច្ចេកវិទ្យាទាំងអស់នោះ៕

ប្រភព៖ Forbes