នេះវាគឺជារឿងដ៏អស្ចារ្យមួយដែលក្មេងប្រុសម្នាក់ឈ្មោះ Elliott Tanner បានរៀនចប់កម្រិតបរិញ្ញាបត្រពីសាកលវិទ្យាល័យ University of Minnesota នៅក្នុងសហរដ្ឋអាមេរិក បើទោះបីជាគេទើបតែមានអាយុ 13ឆ្នាំក៏ដោយ។ ជាមួយគ្នានេះដែរ Elliott Tanner រៀនបានកម្រិតពិន្ទុ GPA 3.78 ស្ទើរតែគ្រប់មុខវិជ្ជា ពិសេសចំពោះមុខវិជ្ជា គណិតវិទ្យាគាត់ទទួលបានពិន្ទុដល់ទៅ 4.00 ឯណោះខណៈដែលពិន្ទុ GPA 4.00 នេះវាមិនសូវមានអ្នកធ្វើបានប៉ុន្មានទេ។ នេះបើយោងតាមការចុះផ្សាយរបស់សារព័ត៌មាន Interesting Engineering ។
ក្រឡេកមកមើលពីប្រវត្តិរបស់គាត់វិញ Elliott Tanner បានកើតនៅឆ្នាំ ២០០៩ ក្នុងសហរដ្ធអាមេរិក ហើយ Elliott Tanner ស្រលាញ់ការសិក្សាតាំងពីក្មេង ពោលគឺ គាំត់ចេះអានអក្សរតាំងពីអាយុ ២ឆ្នាំមកម្ល៉េះ ហើយពេលគាត់មាន អាយុ៥ឆ្នាំ គាត់អាចចងចាំធាតុនៅក្នុងតារាងខួបគីមី ដូចជាម៉ាស អាតូម និងវាឡង់នៃធាតុទាំង ១១៨បាន។ លើសពីនេះទៀត កាលពី Elliott Tanner មានអាយុ ៥ឆ្នាំស្របពេលដែលក្មេងដទៃបានចំណាយជីវិតជាកុមាររបស់ពួកគេក្នុងការដើលេង ផ្ទុយទៅវិញ Elliott Tanner បែរជាចំណាយជីវិតជាកុមារបស់គេនៅក្នុងផ្ទះអានសៀវភៅទៅវិញ។
នៅពេល Elliott Tanner មានអាយុ ៦ឆ្នាំ ម្តាយរបស់គាត់បានយកទៅធ្វើតេស្ត IQ ហើយលទ្ធផលដែលចេញមកគឺ IQ របស់គាត់ស្មើទៅនឹងមនុស្សចាស់ដែលមានអាយុ ៤០ឆ្នាំជាង។ នេះបើយោងតាមការបញ្ជាក់របស់លោកស្រី Michelle Tanner ដែលជាម្តាយរបស់ Elliott Tanner ។ ជាមួយគ្នានេះដែរ ដោយសារតែគាត់ចាប់មេរៀនបានលឿននៅត្រឹមអាយុ ៩ឆ្នាំ Elliott Tanner បានបញ្ចប់កម្រិតសិក្សាថ្នាក់វិទ្យាល័យ ហើយចូលរៀននៅ សាកលវិទ្យាល័យ Normandale Community បានពីរឆ្នាំ គាត់បានដាក់ពាក្យជាប់ចូលទៅរៀននៅសាកលវិទ្យាល័យល្បី University of Minnesota។ ហើយនៅក្នុងខែ ឧសភា ឆ្នាំ២០២២នេះ Elliott Tanner អាចបញ្ចប់ការសិក្សាថ្នាក់បរិញ្ញាបត្រផ្នែករូបវិទ្យាបានយ៉ាងជោគជ័យ។
យ៉ាងណាមិញ បើយោងតាមការសម្ភាសន៍របស់ Elliott Tanner នៅក្នុងកម្មវិធី Stahan Sara and Keke គេបានរៀបរាប់ថា ក្រៅពីមានចំណូលចិត្តខាងរូបវិទ្យា នៅពេលទំនេរគេចូលចិត្តខាងផ្នែក Programming សរសេរកូដកម្មវិធី និងច្នៃបង្កើតឧបករណ៍ប្រើប្រាស់ផ្សេងៗ ដែលអាចជាជំនួយការងាររៀនសូត្ររបស់គេបន្ថែម។
គូសបញ្ជាក់ថា បន្ទាប់ពីចប់ថ្នាក់ បរិញ្ញាបត្រ កាលពីពេលថ្មីៗនេះ Elliott Tanner ទទួលបានការអនុញ្ញាតឱ្យចូលរៀនបន្ដថ្នាក់ PHD ខាងផ្នែករូបវិទ្យាជាន់ខ្ពស់ ដែលត្រូវរៀនរយៈពេល៦ឆ្នាំ នៅសាកលវិទ្យាល័យ University of Menesota។ លើសពីនេះទៀត Elliott Tanner បាននិយាយថា ទៅថ្ងៃអនាគតខ្លួនចង់ក្លាយទៅជា សាស្រ្តាចារ្យមួយរូបនៅក្នុងសាកលវិទ្យាល័យ ដើម្បីចែករំលែកចំណេះដឹងខាងផ្នែករូបវិទ្យាទៅកាន់ក្មេងជំនាន់ក្រោយ៕
ប្រភព People , Stahan Sara and Keke
អត្ថបទដោយ៖ អូន រ៉ាទី
