កិច្ចសម្ភាសន៍ដែលដឹកនាំដោយអ្នកសារព័ត៌មានបច្ចេកវិទ្យាលោក Steven Levy បានចោទសួរចំៗជុំវិញការរិះគន់ពីសំណាក់អ្នកវិភាគ និងសាធារណជន ដែលមើលឃើញថា Apple ហាក់ដូចជាមានជំហានយឺតយ៉ាវជាងក្រុមហ៊ុនប្រជែងយក្សផ្សេងទៀត ក្នុងការបញ្ចេញមុខងារ AI លើឧបករណ៍របស់ខ្លួន។ ឆ្លើយតបនឹងការលើកឡើងនេះ លោក John Ternus បានថ្លែងឃ្លាដ៏គួរឱ្យចាប់អារម្មណ៍ថា៖ យើងមិនចង់បញ្ចេញ AI គ្រាន់តែដើម្បីឱ្យតែបានឈ្មោះថាមាន AI នោះទេ "We don't want to ship AI for AI's sake")...

លោក Ternus បានពន្យល់បន្ថែមថា យុទ្ធសាស្ត្រពិតប្រាកដរបស់ Apple គឺការធ្វើឱ្យបច្ចេកវិទ្យា AI បញ្ចូលគ្នាយ៉ាងរលូនជាមួយជីវិតប្រចាំថ្ងៃរបស់អ្នកប្រើប្រាស់។ លោកបានគូសបញ្ជាក់ថា៖ នៅពេលដែលយើងធ្វើវាបានត្រឹមត្រូវ អ្នកប្រើប្រាស់មិនចាំបាច់ត្រូវគិតថា តើមុខងារនោះដំណើរការដោយ AI ឬដោយសូហ្វវែរធម្មតានោះឡើយ។ អ្វីដែលសំខាន់បំផុត គឺតើយើងបានបង្កើតនូវអ្វីដែលពួកគេពិតជាស្រឡាញ់ និងផ្តល់ប្រយោជន៍ពិតប្រាកដដែរឬទេ?

ការបញ្ជាក់របស់ CEO ថ្មីរូបនេះ បានបង្ហាញយ៉ាងច្បាស់ថា Apple នៅតែបន្តវិនិយោគយ៉ាងសស្រាក់សស្រាំលើបច្ចេកវិទ្យា AI ប៉ុន្តែផ្តោតសំខាន់លើ បទពិសោធអ្នកប្រើប្រាស់, សុវត្ថិភាព និងឯកជនភាព ជាអាទិភាពចម្បង ជាជាងការប្រញាប់ប្រញាល់ដាក់មុខងារដែលមិនទាន់មានភាពច្បាស់លាស់មកបង្អួតទីផ្សារ៕