កាលពីពេលថ្មីៗនេះ មានការចែកចាយបន្តគ្នានូវរូបភាពព័ត៌មានដែល YouTube បានសម្រេចបញ្ចេញមុខងារពិសេស (Premium Feature) ឱ្យប្រើប្រាស់ដោយសេរី។ ការពិតនៃព័ត៌មាននេះ គឺសំដៅទៅលើមុខងារ Picture-in-Picture (PiP) ដែលអនុញ្ញាតឱ្យអ្នកប្រើប្រាស់អាចមើលវីដេអូក្នុងផ្ទាំងតូច នៅពេលចាកចេញពីកម្មវិធី YouTube ទៅកាន់អេក្រង់ Home ឬប្រើកម្មវិធីផ្សេង។
កាលពីមុន មុខងារ PiP នេះត្រូវបានរក្សាទុកសម្រាប់តែអ្នកដែលបង់លុយប្រចាំខែ (YouTube Premium) ប៉ុណ្ណោះ ជាពិសេសនៅលើឧបករណ៍ iOS (iPhone/iPad)។ ប៉ុន្តែបច្ចុប្បន្ន YouTube បានចាប់ផ្តើមបើកឱ្យអ្នកប្រើប្រាស់ដែលមិនទាន់មានគណនី Premium អាចប្រើប្រាស់មុខងារនេះបានជាបណ្តើរៗហើយនៅតាមបណ្តាប្រទេសជាច្រើនជុំវិញពិភពលោក។ សម្រាប់ iPhone/iPad ត្រូវមានកំណែអាប់ដេត iOS 15 ឡើងទៅ ចំណែក Android គឺភាគច្រើនមានរួចជាស្រេចហើយ។
របៀបបើកដំណើរការ (Settings)៖
ប្រសិនបើអ្នកចង់ដឹងថាគណនីរបស់អ្នកអាចប្រើបានឬនៅ អ្នកអាចចូលទៅពិនិត្យមើលក្នុងកម្មវិធី YouTube ដោយផ្ទាល់៖
- ចុចលើ រូប Profile របស់អ្នក
- ជ្រើសរើស Settings រួចចូលទៅកាន់ General
- ស្វែងរកពាក្យ Picture-in-picture រួចចុចបើក (On)។
គួរបញ្ជាក់ផងដែរថា ការដាក់ឱ្យប្រើប្រាស់នេះគឺធ្វើឡើងជាជំហានៗតាមតំបន់ភូមិសាស្ត្រ ដូច្នេះប្រសិនបើអ្នកមិនទាន់ឃើញមានមុខងារនេះនៅក្នុង Settings ទេ សូមរង់ចាំការអាប់ដេតនៅពេលក្រោយ។ សម្រាប់នៅកម្ពុជាគឺមានច្រើនម៉ូឌែលទូរស័ព្ទដែលអាចធ្វើបាន។
