ប្រធានាធិបតីសហរដ្ឋអាមេរិកលោក Donald Trump មានបំណងចង់ចែកប្រាក់ចំនួន ២,០០០ដុល្លារ ដល់ប្រជាជនអាមេរិកជាច្រើន ដោយមិនរាប់បញ្ចូលអ្នកដែលមានប្រាក់ចំណូលខ្ពស់។ នេះបើយោងតាមការចុះផ្សាយរបស់ The Guardian នៅថ្ងៃអាទិត្យទី៩ ខែវិច្ឆិកា ឆ្នាំ២០២៥។
ប្រភពដដែលបានឱ្យដឹងថា ប្រភពប្រាក់ដែលថ្នាក់ដឹកនាំរបស់អាមេរិករូបនេះ ចង់យកទៅចែកប្រជាជន គឺជា ប្រាក់ចំណូលពន្ធគយដែលប្រមូលបានពីបណ្ដាលប្រទេសផ្សេងៗជាដៃគូពាណិជ្ជកម្មរបស់សហរដ្ឋអាមេរិកផ្ទាល់។
យ៉ាងណាមិញ ដំណឹងមួយនេះ ត្រូវបានលោកប្រធានាធិបតី Trump បង្ហោះនៅលើបណ្ដាញសង្គម Truth Social របស់គាត់ ដោយមិនទាន់មានការដាក់ផែនការចូលជាធរមាន ឬទទួលបានការអនុម័តពីសភា នៅឡើយទេ។
គួរជម្រាបផងដែរថា បើយោងតាមរបាយការណ៍ខែកញ្ញារបស់នាយកដ្ឋានរតនាគារ អាមេរិក ពន្ធគយ ចំនួន ១៩៥ពាន់លានដុល្លារ ត្រូវបានប្រមូលក្នុងអំឡុងពេល ៣ត្រីមាសដំបូងនៃឆ្នាំ ២០២៥នេះ៕
