កាលពីថ្មីៗនេះ ក្រុមហ៊ុនយក្យ ជប៉ុន Toyota Motor Corp ត្រូវបានក្រុមពួកហេកឃ័រ មិនស្គាល់មុខ បាន ហេកឬ គេហៅថា Cyber attack ចូលទៅនៅក្នុងទិន្នន័យខ្សែសង្វាក់ផលិតរថយន្តរបស់ក្រុមហ៊ុន Toyota ដែលជាហេតុធ្វើឲ្យក្រុមហ៊ុនយក្យមួយនេះបង្ខំចិត្តនឹងបិទរោងចក្រភ្លាមៗ ។
យោងតាមការចុះផ្សាយរបស់គេហទំព័រ Reuters បានឲ្យដឹងថា ក្រុមហ៊ុន Toyota មានការខឹងសម្បារជាខ្លាំង ដែលក្រុមហ៊ុនរបស់ខ្លួនត្រូវបានពួកហេកឃ័របានចូលទៅវាយលុកទិន្នន័យ ធ្វើឲ្យមានការច្របូកច្របល់ជាខ្លាំង និងបាត់ទិន្នន័យជាច្រើនថែមទៀត។ បន្ថែមពីនេះ Toyota បានប្រកាសកាលពីថ្ងៃចន្ទថា «ខ្លួននឹងធ្វើការបិទរោងចក្រផលិតរថយន្តធំៗចំនួន ១៤ នៅប្រទេសជប៉ុន»។
តួយ៉ាងការផ្អាក់ដំណើរការផលិតរថយន្តនេះទៀតសោត ជាហេតុធ្វើឲ្យមានផលប៉ះពាល់ដល់ខែ្សសង្វាក់ផលិតចំនួន ២៨ខ្សែ និងបង្ខំឲ្យក្រុម Hino Motor និង Daihatsu ដែលជាក្រុមហ៊ុនបុត្រសម័្ពន្ធនៅក្រោមការគ្រប់គ្រងរបស់ Toyota ក៏ត្រូវបានបង្ខំចិត្តឲ្យបញ្ឈប់រាលប្រតិបត្តិការផលិតមួយចំនួននៅក្នុងប្រទេសជប៉ុនផងដែរ នេះបើយោងតាម ក្រសួង នាយកដ្ឋានប្រឆាំងបទល្មើសបច្ចេកវិទ្យានៅកម្ពុជា ។
បច្ចុប្បន្ននេះ ក្រុមហ៊ុន Toyota កំពុងតែធ្វើការវាយតម្លៃនិងតាមដានទាក់ទងទៅនឹងបញ្ហានេះ ប៉ុន្តែពួកគេមិនច្បាស់ទេថា ពេលណារោងចក្រទាំងនោះនឹងអាចចាប់ផ្ដើមដំណើរការឡើងវិញ។
គូសបញ្ជាក់ផងដែរថា ក្រុមហ៊ុន Toyota ក៏ធ្លាប់ត្រូវបានគេហេកចូលវាយលុកទិន្នន័យម្ដងរួចមកហើយកាលពីកន្លងទៅនេះ ។ មិនត្រឹមតែប៉ុណ្ណោះ ក្រុមហ៊ុនធំៗនៅជប៉ុនជាច្រើន ដូចជាក្រុមហ៊ុន Sony ជាដើម ក៏ត្រូវបានគេវាយប្រហារដោយជនមិនស្គាល់មុខ និងបានបង្ហោះនូវទិន្នន័យផ្ទៃក្នុងរបស់ក្រុមហ៊ុន ហើយថែមទាំងបានបិទប្រព័ន្ធកុំព្យូទ័រទាំងអស់របស់ Sony ៕
