យ៉ាងណាមិញយោងតាមសារព័ត៌មានរបស់ Bangkok Post បានបញ្ជាក់ឲ្យដឹងថា ក្រុមហ៊ុនអាកាសចរណ៍ថៃបានអនុវត្តបទប្បញ្ញត្តិថ្មីចាប់ពីពេលនេះតទៅគ្រប់អ្នកដំណើរទាំងអស់ដែលមានបំណងចង់ហោះហើរលើទឹកដីប្រទេសថៃគឺមិនអនុញ្ញាតឲ្យប្រើប្រាស់ Power Bank ឬដុំសាកថ្មក្នុងអំឡុងពេលហោះហើរឡើយ មិនថាជាជើងដំណើរហោះទៅ ឬហោះមកនោះទេប្រសិនបើមានគួរតែកុំប្រើ ក្នុងករណីអ្នកដំណើររូបណានៅតែបំពាននឹងចាត់ទុកជាការខុសច្បាប់។ ក្រុមហ៊ុនអាកាសចរណ៍ថៃបានបញ្ជាក់ពីវិធានការនេះនឹងចាប់អនុវត្តពីថ្ងៃ១៥ មីនា ឆ្នាំ២០២៥ ខាងមុខនេះតទៅ។

សម្រាប់ហេតុផលដែលអាកាសចរណ៍ថៃបានហាមឃាត់បែបនេះគឺដោយសារតែ ធានានូវសុវត្ថិភាពខ្ពស់បំផុតដល់អ្នកដំណើរ បុគ្គលិកអាកាសចរណ៍ និងក្រុមប្រតិបត្តិការទូទៅ ដោយធ្លាប់មានករណីអគ្គិភ័យអាកាសចរណ៍អន្តរជាតិដែលសង្ស័យថាមានទាក់ទងទៅនឹងការប្រើប្រាស់ Power Bank ដូច្នេះក្រុមហ៊ុនអាកាសចរណ៍ថៃបានដាក់ឲ្យប្រើប្រាស់នូវវិធានការសុវត្ថិភាពថ្មីមួយនេះ ចាប់ពីថ្ងៃទី១៥ ខែមីនា ឆ្នាំ២០២៥ នេះតទៅ។  ក្រុមហ៊ុនអាកាសចរណ៍ថៃបានអំពាវនាវឲ្យអ្នកដំណើរគ្រប់គ្នាក្នុងការអនុវត្តតាមបទប្បញ្ញត្តិថ្មីនេះ និងសូមការអាធ្យាស្រ័យដល់អ្នកដំណើរជាតិ និងអន្តរជាតិផងដែរ។

 ដូច្នេះអ្នកដំណើរអាចយក Power Bank តាមខ្លួនបានលុះត្រាតែតាមការកំណត់ដែលបានចែងខាងក្រោម៖

• Power Bank ដែលមានថ្មរហូតដល់ 100 វ៉ាត់-ម៉ោង (Wh) ឬ 20,000 មីល្លីអំពែរ-ម៉ោង (mAh): អតិបរមា 20 គ្រឿងក្នុងមួយអ្នកដំណើរ។
• រវាង 100 វ៉ាត់-ម៉ោង / 20,000 មីល្លីអំពែរ-ម៉ោង និង 160 វ៉ាត់-ម៉ោង / 32,000 មីល្លីអំពែរ-ម៉ោង: អតិបរមា 2 គ្រឿងក្នុងមួយអ្នកដំណើរ។
• លើសពី 160 វ៉ាត់-ម៉ោង / 32,000 មីល្លីអំពែរ-ម៉ោង គឺនឹងមានការហាមឃាត់មិនឲ្យដាក់ចូលក្នុងវាលី និងប្រើប្រាស់លើយន្តហោះឡ់ើយ។

គូសបញ្ជាក់ផងដែរថា Power Bank ក៏ជាមួយផ្នែកដែលអាចជាការបង្ករនូវហានិភ័យដល់ការធ្វើដំណើរតាមអាកាស ជាពិសេស Power Bank ដែលមានអំពែរខ្លាំងដែលអាចផ្ទុកសារធាតុកំហាប់ថ្មកាន់បានយូរដែលអាចបណ្តាលឲ្យមានការឆាបឆេះនូវចំណុចណាមួយដែលអ្នកដំណើរនឹកស្មានមិនដល់ ដូច្នេះហើយទើបការពារប្រសើរជាងព្យាបាល។

អត្ថបទដោយ៖ ងួន ឃុនណា