អ្វីដែលគួរឱ្យកត់សម្គាល់គឺ មានខេត្តចំនួន២ ដែលមានចំនួនគម្រោងវិនិយោគច្រើនជាងគេបង្អស់។ ក្នុងនោះ ខេត្តកំពង់ស្ពឺ ឈរលើលំដាប់ថ្នាក់ខ្ពស់បំផុត មានរហូតដល់ទៅ ១១៧គម្រោងវិនិយោគ និងមួយទៀតគឺខេត្តស្វាយរៀង មានរហូតដល់ទៅ ១១៣គម្រោងវិនិយោគ។

តាមប្រភពដដែល បានបញ្ជាក់ថា ក្នុងចំណោមវិស័យជាច្រើន វិស័យឧស្សាហកម្មបានទាក់ទាញគម្រោងច្រើនជាងគេ ដោយមានទុនវិនិយោគសរុបប្រមាណ ៥ពាន់លានដុល្លារ។ នៅក្នុងវិស័យឧស្សាហកម្មនេះ វិនិយោគិន បានបោះទុនទៅលើក្រុមហ៊ុន និងរោងចក្រមួយចំនួនដូចជា គ្រឿងអេឡិចត្រូនិច គ្រឿងបន្លាស់រថយន្ត​ រោងចក្រតម្លើងរថយន្ត រោងចក្រផលិតអាហាកែច្នៃ និងឧស្សាហកម្មផ្សេងៗទៀតជាច្រើន។

គួរជម្រាបផងដែរថា ក្នុងចំណោមគម្រោងវិនិយោគចំនួន ៤៩១គម្រោង ក្នុងនោះមាន ១៩១គម្រោងស្ថិតក្នុងតំបន់សេដ្ឋកិច្ចពិសេស។ អ្វីដែលកាន់តែពិសេសគឺ គម្រោងវិនិយោគទាំងអស់ បានបង្កើតការងារសរុបប្រមាណជាង ៣៤០ពាន់កន្លែង សម្រាប់ប្រជាជនកម្ពុជាយើង៕