ល្បិចកលដ៏គួរឱ្យភ្ញាក់ផ្អើលរបស់ក្រុម Hacker ទាំងនេះ គឺពួកគេបានដើរតួធ្វើជាបុគ្គលិកផ្នែកព័ត៌មានវិទ្យា ឬអ្នកស្វែងរកការងារអនឡាញ ដើម្បីដាក់ពាក្យធ្វើការពីចម្ងាយ នៅក្នុងក្រុមហ៊ុនបច្ចេកវិទ្យានានានៅអាមេរិក អឺរ៉ុប និងអាស៊ី។ ដើម្បីបន្លំខ្លួន ពួកគេបានប្រើប្រាស់បច្ចេកវិទ្យា AI ជំនាន់ថ្មីដើម្បីបង្កើតរូបភាពក្លែងបន្លំ ក្នុងពេលជាក់ស្តែង ផ្សំជាមួយនឹងឯកសារសម្គាល់ខ្លួនក្លែងក្លាយ ដូចជា លិខិតឆ្លងដែន ឬប័ណ្ណបើកបរដែលលួចពីគេ ដើម្បីបិទបាំងអត្តសញ្ញាណពិតរបស់ពួកគេ ដែលជាជនជាតិកូរ៉េខាងជើង។

នៅពេលដែលពួកគេអាចចូលទៅធ្វើការក្នុងក្រុមហ៊ុនទាំងនោះបានសម្រេច ក្រៅពីបានលួចទិន្នន័យសម្ងាត់ និងកម្មសិទ្ធិបញ្ញារបស់ក្រុមហ៊ុនហើយនោះ ពួកគេថែមទាំងទទួលបានប្រាក់ខែជាធម្មតាពីក្រុមហ៊ុនទាំងនោះទៀតផង។ ប្រាក់ខែទាំងអស់នោះ ត្រូវបានបង្វែរចូលទៅក្នុងកាបូបលុយរបស់របបដឹកនាំក្រុងព្យុងយ៉ាង។ អ្វីដែលកាន់តែអាក្រក់នោះគឺ នៅពេលដែលក្រុមហ៊ុនដឹងខ្លួន ហើយដេញពួកគេចេញ ក្រុម Hacker ទាំងនេះតែងតែគំរាមកំហែងបង្ហោះទិន្នន័យដែលពួកគេលួចបាន ដើម្បីជម្រិតទារប្រាក់ ពីក្រុមហ៊ុនថែមទៀត។

គោលដៅធំបំផុតនៃការវាយប្រហារ និងបន្លំខ្លួនធ្វើការនេះ គឺដើម្បីលួចព័ត៌មាន និងលុយគ្រីបតូ (Cryptocurrency) ក្នុងចំនួនដ៏មហាសាល ដោយគ្រាន់តែក្នុងឆ្នាំ ២០២៥ តែមួយឆ្នាំប៉ុណ្ណោះ ពួកគេលួចបានរហូតដល់ទៅប្រមាណ ២ ពាន់លានដុល្លារ។ មូលហេតុដែលកូរ៉េខាងជើងខំប្រឹងលួចលុយឌីជីថលទាំងនេះ គឺដើម្បីយកទៅផ្គត់ផ្គង់ដល់កម្មវិធីអាវុធនុយក្លេអ៊ែររបស់ខ្លួន ដែលត្រូវបានហាមឃាត់ដោយច្បាប់អន្តរជាតិ និងដើម្បីគេចចេញពីទណ្ឌកម្មសេដ្ឋកិច្ចពីសំណាក់សហរដ្ឋអាមេរិក និងអង្គការសហប្រជាជាតិ ដែលបានបិទខ្ទប់ពួកគេមិនឱ្យប្រើប្រាស់ប្រព័ន្ធធនាគាររបស់ពិភពលោកខាងលិច។