កម្មវិធី Style Sketch ត្រូវបានរចនាឡើងដើម្បីជាជំនួយការផ្នែកជ្រើសរើសម៉ូដសម្លៀកបំពាក់ផ្ទាល់ខ្លួន ដោយអាចជួយអ្នកប្រើប្រាស់អាចបង្កើតគំនិតផ្គូផ្គងសម្លៀកបំពាក់ផ្សេងៗគ្នា តាមរយៈរូបភាពខោអាវដែលខ្លួនមាន។ អ្នកប្រើប្រាស់ អាចបញ្ចូលរូបភាពសម្លៀកបំពាក់ដោយផ្ទាល់ពីក្នុងទូរសព្ទ ថតរូប ឬវីដេអូខ្លីៗ ហើយក៏អាចភ្ជាប់ជាមួយគណនី Instagram ដើម្បីជួយប្រមូលរូបភាពសម្លៀកបំពាក់ដែលធ្លាប់បង្ហោះផងដែរ។

ចំណុចគួរឱ្យចាប់អារម្មណ៍នៃកម្មវិធីនេះ អាចណែនាំអ្នកអំពីម៉ូដខោអាវ និងបង្ហាញការស្លៀកពាក់តាមរូបរាងនិម្មិតដែលត្រូវនឹងទម្រង់រាងកាយ និងពណ៌សម្បុររបស់អ្នកប្រើ។ ជាមួយគ្នានេះ អ្នកប្រើអាចមើលឃើញគំនិតនៃការស្លៀកពាក់មុនពេលសម្រេចចិត្តជ្រើសរើសឈុតណាមួយយកមកស្លៀកនៅលើខ្លួន។

មិនត្រឹមតែជួយជ្រើសរើសខោអាវសម្រាប់ស្លៀកប្រចាំថ្ងៃប៉ុណ្ណោះទេ Style Sketch ក៏អាចជួយរៀបចំឈុតសម្លៀកបំពាក់សម្រាប់ដំណើរកម្សាន្តបានដែរ។ អ្នកប្រើប្រាស់ គ្រាន់តែបញ្ចូលទីតាំងដែលចង់ទៅ ចំនួនថ្ងៃ និងសកម្មភាពដែលគ្រោងនឹងធ្វើ នោះកម្មវិធីនឹងជួយរៀបចំឈុតសម្លៀកបំពាក់សម្រាប់ថ្ងៃនីមួយៗ ដោយគិតគូរពីការព្យាករណ៍អាកាសធាតុ និងគម្រោងធ្វើដំណើររបស់អ្នកប្រើផងដែរ។

យោងតាមការរាយការណ៍របស់សារព័ត៌មាន TechCrunch បានបញ្ជាក់ថា បច្ចុប្បន្ន កម្មវិធីនេះអាចប្រើប្រាស់បាននៅប្រទេសឥណ្ឌូនេស៊ី សិង្ហបុរី និងថៃ តាមរយៈទូរសព្ទដែលប្រើប្រព័ន្ធប្រតិបត្តិការ iOS និង Android។ ចំណែកឯការពង្រីកទៅកាន់ប្រទេសផ្សេងទៀតនៅពេលណានោះ Meta មិនទាន់បានបញ្ជាក់នៅឡើយទេ។ គួរបញ្ជាក់ថា Style Sketch គឺជាកម្មវិធី AI មួយក្នុងចំណោមកម្មវិធីថ្មីៗដែល Meta កំពុងសាកល្បង និងដាក់ឱ្យប្រើប្រាស់ ដោយមានគោលដៅពង្រីកការប្រើប្រាស់បច្ចេកវិទ្យា AI ទៅកាន់សេវាកម្មផ្សេងៗក្នុងជីវិតប្រចាំថ្ងៃរបស់អ្នកប្រើប្រាស់។