ថ្មីៗនេះ មេធំរបស់ក្រុមហ៊ុន Tesla លោក Elon Musk បានប្រកាសក្នុង Twitter កាលពីថ្ងៃទី៦ ខែតុលា ថារថយន្តកុងតាន័រអគ្គិសនី Tesla Semi នឹងចាប់ផ្តើមបើយុទ្ធនាការបើកដំណើរការខ្សែសង្វាក់ផលិតពីពេលនេះតទៅ ។ មួយវិញទៀតក្រុមហ៊ុន Pepsi ដែលបានកក់ Tesla Semi ចំនួន ១០០គ្រឿងតាំងឆ្នាំ៥មុន Tesla អះអាងថានឹងទទួលរថយន្តនេះបានមុនគេបង្អស់នៅពេលវេលាជាក់លាក់ ថ្ងៃទី១ ខែធ្នូ ឆ្នាំ២០២២ ខាងមុខនេះ ។
បើយោងតាមការចេញផ្សាយរបស់សារព័ត៌មាន CNBC បានឲ្យដឹងថា ក្រុមហ៊ុន PepsiCO បានធ្វើការកក់រថយន្តកុងតាន័រ Tesla Semi ចំនួន១០០គ្រឿង ចាប់តាំងពី Tesla បានប្រកាសនូវ Concept រថយន្តខ្នាតធំនេះដំបូងនៅឆ្នាំ២០១៧ មកម្លេះ ។ ផ្ទុយទៅវិញ គម្រោងការនៃខ្សែសង្វាក់ផលិត Tesla Semi នេះត្រូវបានអាក់ខាន និងផ្អាក់ការផលិតជាច្រើនដង រហូតមកពេលនេះ ទើប Tesla ប្រកាសជាផ្លូវការនឹងផលិតរថយន្តខ្នាតធំនេះចាប់ពីថ្ងៃប្រកាសនេះតទៅ។
ម្យ៉ាងវិញទៀត Tesla Semi ត្រូវបានគេរំពឹងថានឹងមានតម្លៃ $180,000 ក្រោយពីការកាត់ពន្ធចំនួន $40,000 នៅសហរដ្ឋអាមេរិក។
បើយោងតាមសម្តីរបស់លោក Elon Musk បានបញ្ជាក់នៅក្នុងអាខោន Twitter ថា Tesla Semi មានសមត្ថភាពបើកបរចម្ងាយរហូតដល់ 805Km ដោយគ្រាន់តែសាកថ្មពេញម្តង ។ ប៉ុន្តែគេមិនទាន់ដឹងថា Tesla នឹងមានគម្រោងផលិតរថយន្តខ្នាតធំនេះចំនួនកំណត់ប៉ុន្មានឡើយ ៕
អត្ថបទដោយ៖ ព្រឹម ភក្តី
