ថ្មីៗនេះ នៅសហរដ្ឋអាមេរិក មានរដ្ឋមួយឈ្មោះថា Montana បានធ្វើសម្រេចចិត្តមុនគេ ក្នុងការហាមឃាត់កម្មវិធី TikTok មិនអនុញ្ញាតឲ្យប្រជាជនរបស់ខ្លួនប្រើទៀតទេ ក្រោមហេតុផលការពារប្រជាជនខ្លួនពីការប្រមូលទិន្នន័យ ស៊ើបការណ៍សម្ងាត់ពីកម្មវិធី TikTok ដោយមានអ្នកគ្រប់គ្រងពីក្រោយជារដ្ឋាភិបាលចិន។ នេះបើយោងតាមប្រភពពី REUTERS។
សម្រាប់ការហាមឃាត់នេះ លោក Greg Gianforte ចៅហ្វាយក្រុង Montana លើកឡើងថា ៖ ដើម្បីការពារពីកាស៊ើបការណ៍យ៉ាងសម្ងាត់តាមរយ:កម្មវិធី TikTok ដែលមានអ្នកប្រើប្រាស់ ១៥០លាននាក់ទូទាំងសហរដ្ឋអាមេរិក ដោយគាត់សម្រេចចិត្តធ្វើការ Ban កម្មវិធី TikTok នេះមុនគេ ក្នុងចំណោមរដ្ឋទាំងអស់នៅអាមេរិក។
ទាក់ទងនឹងការហាមប្រាមនេះដែរ គឺមិនទាន់មានការផាកវិន័យតាមច្បាប់ណាមួយ ទៅប្រជាជនដែលបានប្រើប្រាស់កម្មវិធីនេះនៅឡើយទេ ប៉ុន្តែច្បាប់នេះនឹងត្រូវដាក់ចូលក្នុងធរមាននៅថ្ងៃទី០១ ខែមករា ឆ្នាំ២០២៤ ពេលនោះប្រសិនមានល្មើសនឹងច្បាប់នេះ អាចនឹងមានបញ្ហាប្រឈមមុននឹងច្បាប់ ឬត្រូវនឹងមានការផាកវិន័យជាដើម។
គួរជំរាបផងដែរថា យោងតាមការមជ្ឈមណ្ឌលស្រាវជ្រាវ Pew បានឲ្យដឹងថា ក្នុងចំណោមមនុស្ស ១៥០លាននាក់នៅអាមេរិកដែលលេង TikTok ក្នុងនោះមាន ៦៧% ជាក្មេងជំទង់មានអាយុ ១៣ ទៅ ១៧ឆ្នាំ បានប្រើប្រាស់ TikTok ហើយ ១៦% នៃក្មេងទាំងនោះបាននិយាយថា ពួកគេប្រើកម្មវិធីនេះចំណាយពេលសឹងតែពេញ ១ថ្ងៃ ហើយ TikTok ក៏ធ្លាប់បានអះអាងថា អ្នកប្រើប្រាស់កម្មវិធីខ្លួន ភាគច្រើនជាមនុស្សវ័យ ១៨ឆ្នាំ ៕
អត្ថបទ៖ ព្រឹម ភក្តី
