កន្លងមក យើងធ្លាប់តែឃើញគេយកប្រេងឆាមកចំអិនម្ហូបសម្រាប់បរិភោគ ប្លែកអីតែក្រុមហ៊ុនអាកាសចរណ៍របស់ម៉ាឡេស៊ីមួយនេះបែកជាយកប្រេងឆាចាក់ក្នុងយន្តហោះជំនួយសាំងទៅវិញ ។
កាលពីថ្មីៗនេះ ក្រុមហ៊ុនអាកាសចរណ៍ ម៉ាឡេស៊ី អ៊ែរឡាញ ( Malaysia airline )បានបង្កើតគម្រោងហោះហើរទៅកាន់ប្រទេសសិង្ហបុរី ជាលើកដំបូងបង្អស់ ។ ចំពោះយន្តហោះនោះផងដែរ ត្រូវបានគេដឹងថា មិនមែនចាក់សាំងយន្តហោះសុទ្ធទាំងអស់ទេ ពោលគឺបានយកប្រេងឆា ដែលប្រើរួចចេញពីផ្ទះបាយ ឬ តាមភោជនីយអាហារផ្សេងៗ មកចម្រាញ់ជាសាំង SAF ( Sustainable Aviation Fuel ) ។ នេះបើយោងតាមការចេញផ្សាយពីគេហទំព័រ Thesundaily ។
តាមប្រភពដដែលបានឲ្យដឹងថា ការរៀបចំគម្រោងជើងហោះហើរនេះ នឹងត្រូវចាប់ផ្តើមនៅថ្ងៃទី ៥ ខែមិថុនា ដែលស្របពេល ជាថ្ងៃ ទិវាបរិស្ថានពិភពលោកផងដែរ ។ សម្រាប់ជើងហោះហើរនេះ ទៀតសោតត្រូវបានធ្វើឡើងជា ២ ខ្សែ ដោយខែ្សទី១ ចេញពីទីក្រុង កូឡាឡាំប៉ួ ទៅកាន់ប្រទេសសិង្ហបុរី ដោយយន្តហោះឈ្មោះ MH603 និង ខែ្សទី២ ចេញពីសិង្ហបុរី មកទីក្រុងកូឡាឡាំប៊ួ វិញ តាមរយ:យន្តហោះឈ្មោះ MH606 ។
ម្យ៉ាងវិញទៀត ក្រុមហ៊ុនអាកាសចរណ៍ ម៉ាឡេស៊ី អ៊ែរឡាញ បានផ្តល់ជូនការបញ្ចុះតម្លៃ ១៥% សម្រាប់ភ្ញៀវទេសចរណ៍ណាដែលបានកក់សំបុត្រជើងយន្តហោះទាំងពីរខ្សែ មុនថ្ងៃទី ៥ ខែមិថុនា ឆ្នាំ ២០២២ ពោលគឺចាប់ពីថ្ងៃនេះទៅរហូតដល់ថ្ងៃទី៤ ។ក្នុងការកក់សំបុត្រនោះផងដែរ ក្រុមហ៊ុនតម្រូវឲ្យប្រើនូវលេខកូដ « SAF2022 » ដើម្បីបំពេញចូលជើងហោះហើររបស់លោកអ្នកដែលបានកក់ទុក តាមរយ:គេហទំព័រ www.malaysiaairlines.com ។
គូសបញ្ជាក់ផងដែរថា សម្រាប់ជើងហោះហើរទាំងពីរខែ្សនោះ គឺដំណើរការលើយន្តហោះ Boeing 737-800 ដោយកការប្រើសាំងលាយបញ្ចូលគ្នារវាង SAF ដែលចម្រាញ់ចេញពីប្រេងឆាប្រើរួច ចំនួន ៣៨% និងសាំងយន្តហោះធម្មតា( onventional jet fuel) ៦២% ផងដែរ ៕
អត្ថបទដោយ៖ ព្រឹម ភក្តី
