ឡានក្រុងជាយានជំនិះសម្រាប់ធ្វើដំណើរយ៉ាងល្អមួយក្នុងទីកក្រុង និងការធ្វើដំណើរទៅខេត្តឆ្ងាយៗ មិនតែប៉ុណ្ណោះការជិះឡានក្រុងគឺមានសុវត្ថិភាពខ្ពស់ ព្រមទាំងជួយកាត់បន្ថយការចំណាយ និងការកកស្ទះចរាចរណ៍បានច្រើនមែនទែន។ ហើយកាលកន្លងពីពេលថ្មីៗនេះ កម្ពុជាទើបតែទទួលបានឡានក្រុង ២០០គ្រឿងបន្ថែមទៀតពីខាងប្រទេសកូរ៉េ ដើម្បីធ្វីឱ្យប្រសើរឡើងនូវសេវាដឹកជញ្ជូនសាធារណៈតាមរថយន្តក្រុង ក្នុងរាជធានីភ្នំពេញ ។
យោងតាមការចេញផ្សាយប្រភពពី រដ្ឋបាលរាជធានីភ្នំពេញ បានឲ្យដឹងកាលថ្ងៃទី២៨ ខែកុម្ភៈ ឆ្នាំ២០២៣ ថា ក្នុងពិធីប្រគល់-ទទួលរថយន្តក្រុង ក្រុមហ៊ុន ប៊ូយ៉ុង គ្រុប បានប្រគល់រថយន្តក្រុងប្រភេទថ្មី ចំនួន២០០គ្រឿង ជូនរដ្ឋបាលរាជធានីភ្នំពេញ ដើម្បីធ្វីឱ្យប្រសើរឡើងនូវសេវាដឹកជញ្ជូនសាធារណៈតាមរថយន្តក្រុង ក្នុងរាជធានីភ្នំពេញ ។
ក្នុងកម្មវិធីនេះដែរមានការចូលរួមពីសំណាក់ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ឯកឧត្ដម ផាក ជុកវុក ( Park Jung Wook ) ឯកអគ្គរដ្ឋទូតវិសាមញ្ញ និងពេញសមត្ថភាពរបស់សាធារណរដ្ឋកូរ៉េ ប្រចាំព្រះរាជាណាចក្រកម្ពុជា និងលោកបណ្ឌិត លី ជុងគឿន ( Lee Joong Keun ) ប្រធានប្រឹក្សាភិបាលក្រុមហ៊ុន ប៊ូយ៉ុង គ្រុប អញ្ជើញជាគណៈអធិបតីក្នុងពិធីប្រគល់-ទទួលរថយន្តក្រុងប្រភេទថ្មី ។
គួរជំរាបផងដែររ ការប្រគល់រថយន្តក្រុងនេះ សំដៅលើសេវាដឹកជញ្ជូនសាធារណតាមរថយន្តក្រុង ក្នុងរាជធានីភ្នំពេញឲ្យកាន់តែរីកចម្រើន ព្រមទាំងចូលរួមនូវកាត់បន្ថយការកកស្ទះក្នុងទីក្រុង និងការបន្ថយគ្រោះថ្នាក់ចរាចរណ៍ដោយសារគ្រឿងស្រវឹងផងដែរ៕
អត្ថបទដោយ៖ ព្រឹម ភក្តី
