ស្របពេលដែលតម្លៃហាងឆេងមាសកំពុងសម្រុកហក់ឡើងខ្លាំង ដល់ជាង៥ពាន់ដុល្លារក្នុងមួយតម្លឹង ថ្នាក់ដឹកនាំធនាគារ JPMorgan ដែលជាធនាគារដ៏ធំបំផុតមួយរបស់សហរដ្ឋអាមេរិក បានប្រកាសថា តម្លៃមាសនឹងបន្តកើនឡើងថែមទៀត មិនថយក្រោយឡើយ។ នេះបើយោងតាមការចុះផ្សាយរបស់គេហទំព័រ investing live។
ក្នុងនោះ នាយកប្រតិបត្តិនៃធនាគារ JPMorgan លោក Jamie Dimon បានថ្លែងប្រាប់អ្នកសារព័ត៌មាន នៅក្នុងព្រឹត្តិការណ៍ Fortune យ៉ាងដូច្នេះថា «តម្លៃមាសអាចនឹងឡើងដល់ ៥,០០០ដុល្លារ ឬ ១០,០០០ដុល្លារ ក្នុងមួយអោន យ៉ាងងាយស្រួលនៅក្នុងបរិយាកាសទីផ្សារប្រែប្រួលបែបនេះ។ ហើយនេះគឺជាពេលវេលាដ៏សមហេតុផលមួយ ដែលអ្នកគួរតែមានកាន់កាប់មាសមួយចំនួននៅក្នុងផលប័ត្ររបស់អ្នក»។
យ៉ាងណាមិញ តម្លៃមាស ៥,០០០ដុល្លារ ក្នុងមួយអោន វាស្មើនឹងប្រមាណ ៦,០២៤ដុល្លារ ក្នុងមួយតម្លឹង ឬ ប្រហែល ៦០៣ដុល្លារក្នុងមួយជី។ ប្រសិនបើឡើងដល់ខ្ទង់ ១០,០០០ដុល្លារ ក្នុងមួយអោន វាស្មើនឹងប្រមាណ ១២,០៤៨ដុល្លារ ក្នុងមួយតម្លឹង ឬប្រហែល ១,២០៥ដុល្លារក្នុងមួយជី។
គួរជម្រាបផងដែរថា បើគិតត្រឹមពេលព្រឹក ថ្ងៃទី១៥ ខែតុលា ឆ្នាំ២០២៥នេះ តម្លៃមាសសកលគឺ ៤,១៨៦ដុល្លារក្នុងមួយអោន ស្មើនឹងប្រមាណ ៥,០៤៣ដុល្លារក្នុងមួយតម្លឹង ឬប្រហែល ៥០៤ដុល្លារក្នុងមួយជី។ នេះបើយោងតាមទិន្នន័យលើគេហទំព័រ GOLDPRICE៕
