១./ ទិន្នន័យទីមួយដែលត្រូវរក្សាជាសម្ងាត់បំផុតនោះគឺ លេខកូដផ្ទៀងផ្ទាត់ ឬលេខកូដ OTP (One-Time Password) ដែលផ្ញើចូលមកកាន់ទូរស័ព្ទរបស់អ្នកតាមរយៈសារ SMS ឬកម្មវិធីនានា។ លេខកូដទាំងនេះប្រៀបដូចជាកូនសោចុងក្រោយសម្រាប់បើកចូលទៅកាន់គណនី Apple ID, iCloud, Telegram ឬកម្មវិធីធនាគារជាដើម ដែលទោះបីជាជនខិលខូចមិនដឹងលេខសម្ងាត់ចាស់របស់អ្នកក៏ដោយ ក៏ពួកគេអាចប្រើប្រាស់លេខកូដ OTP នេះដើម្បីលួចគ្រប់គ្រងគណនីរបស់អ្នកទាំងស្រុងបានដែរ។

២./ ទិន្នន័យទីពីរដែលគ្រោះថ្នាក់មិនចាញ់គ្នាឡើយគឺ រូបថតអេក្រង់នៃកូដ QR សម្រាប់សង្គ្រោះគណនី និងព័ត៌មានហិរញ្ញវត្ថុ រួមទាំងការផ្ញើលេខសម្ងាត់ Apple ID ឲ្យអ្នកដទៃប្រើប្រាស់រួមគ្នា។ ការចែករំលែក Apple ID ឲ្យគេប្រើ មិនត្រឹមតែធ្វើឲ្យរូបថត សារ និងទីតាំងប្រចាំថ្ងៃរបស់អ្នកបែកធ្លាយទៅលើទូរសព្ទអ្នកដទៃនោះទេ ប៉ុន្តែថែមទាំងផ្តល់សិទ្ធិឲ្យគេអាចចូលទៅលុប ឬចាក់សោបិទ iPhone របស់អ្នកពីចម្ងាយ (Lock iCloud) តាមចិត្តចង់ទៀតផង។

គូសបញ្ជាក់ផងដែរថា ដើម្បីធានាសុវត្ថិភាពក្នុងការប្រើប្រាស់ប្រចាំថ្ងៃ អ្នកគួរចងចាំថា ទូរស័ព្ទ iPhone នីមួយៗត្រូវតែមាន Apple ID ផ្ទាល់ខ្លួនមួយដាច់ដោយឡែ (ហាមប្រើរបស់គេបង្កើតឲ្យ ឬបង្កើតឲ្យគេប្រើ) ហើយទាំងក្រុមហ៊ុន Apple និងស្ថាប័នធនាគារ ក៏មិនដែលទាក់ទងមកទាមទារសុំលេខកូដសម្ងាត់ពីអ្នកឡើយ។ ការបង្កើតទម្លាប់ត្រួតពិនិត្យឲ្យបានច្បាស់លាស់ និងការមិនចែករំលែកគណនីផ្ទាល់ខ្លួនទៅឲ្យអ្នកដទៃ គឺជាខែលការពារដ៏រឹងមាំបំផុតក្នុងការថែរក្សាឯកជនភាព និងទ្រព្យសម្បត្តិរបស់អ្នកឲ្យមានសុវត្ថិភាពខ្ពស់។