ទោះជាយ៉ាងណាក៏ដោយ លទ្ធផលនេះត្រូវបានគេមើលឃើញថាជា "ការឈ្នះទាំងឈាមជោកខ្លួន" ព្រោះវាបានបន្សល់ទុកនូវស្លាកស្នាមអវិជ្ជមានយ៉ាងធ្ងន់ធ្ងរដល់កេរ្តិ៍ឈ្មោះ និងភាពជឿជាក់ផ្ទាល់ខ្លួនរបស់លោក Altman នៅក្នុងខ្សែភ្នែកសាធារណជន និងអ្នកវិនិយោគ។ អំឡុងពេលសវនាការ លោក Altman បានរងការវាយប្រហារយ៉ាងខ្លាំងលើរឿង «ភាពស្មោះត្រង់» ដែលជាចំណុចស្នូលនៃក្តីក្តាំនេះ ដោយអតីតសហការី និងសាក្សីសំខាន់ៗជាច្រើនរូប បានឡើងមកស្បថនិងផ្តល់សក្ខីកម្មម្តងហើយម្តងទៀតថា លោកជាមេដឹកនាំដែលមិនគួរឱ្យទុកចិត្ត និងជាមនុស្សភូតភរ។

ភស្តុតាងជាឯកសារផ្ទៃក្នុងជាច្រើនត្រូវបានបើកកកាយជាសាធារណៈ រួមមានអនុស្សរណៈសម្ងាត់កាលពីឆ្នាំ២០២២ របស់អតីតប្រធានផ្នែកបច្ចេកវិទ្យា (CTO) លោកស្រី Mira Murati ដែលបានរិះគន់ថា របៀបដឹកនាំរបស់លោក Altman បង្កឱ្យមានភាពវឹកវរ ហើយលោកស្រីថែមទាំងបានបញ្ជាក់ក្នុងវីដេអូសក្ខីកម្មថា លោក Altman មិនមែនតែងតែមានភាពស្មោះត្រង់នោះទេ និងចូលចិត្តបំបែកបំបាក់ថ្នាក់ដឹកនាំគ្នាឯង។ លើសពីនេះ តុលាការក៏បានលាតត្រដាងថា លោក Altman មានការវិនិយោគផ្ទាល់ខ្លួនរាប់ពាន់លានដុល្លារនៅក្នុងក្រុមហ៊ុនដទៃទៀត ដែលមានទំនាក់ទំនងរកស៊ីជាមួយ OpenAI ដែលបង្កជាមន្ទិលជុំវិញបញ្ហាទំនាស់ផលប្រយោជន៍។

ទោះបីជាមេធាវីរបស់ OpenAI ព្យាយាមការពារថា នេះជាការវាយប្រហារបង្ខូចកេរ្តិ៍ឈ្មោះពីខាងភាគីលោក Musk និងមានបុគ្គលិកខ្លះចេញមុខគាំទ្រលោក Altman ក៏ដោយ ក៏ភស្តុតាងអវិជ្ជមានទាំងអស់នេះត្រូវបានកត់ត្រាក្នុងសំណុំរឿងតុលាការជាសាធារណៈជាអចិន្ត្រៃយ៍ទៅហើយ។ អ្នកជំនាញផ្នែកច្បាប់និងអ្នកវិភាគបានលើកឡើងថា ទោះជា OpenAI រួចផុតពីគ្រោះថ្នាក់ផ្លូវច្បាប់ដ៏ធំបំផុតក៏ដោយ ប៉ុន្តែរាល់វិនិយោគិនស្ថាប័នធំៗដែលរៀបនឹងបោះទុនក្នុង IPO តម្លៃរាប់ពាន់លានដុល្លារ ច្បាស់ជាត្រូវយកប្រវត្តិនៃការសាកសួរដេញដោលក្នុងតុលាការនេះ ទៅធ្វើការវិភាគនិងវាយតម្លៃឡើងវិញយ៉ាងហ្មត់ចត់លើកម្រិតនៃភាពជឿជាក់របស់លោក Sam Altman មុននឹងសម្រេចចិត្តរួមទុនជាមួយក្រុមហ៊ុន។