កាលពីខែមុនសហភាពអឺរ៉ុបបានចេញសេចក្តីសម្រេចរួចហើយដោយឱ្យក្រុមហ៊ុនអេឡិចត្រូនិចមួយចំនួនធ្វើការផ្លាស់ប្តូររន្ធសាកថ្មនៃឧបករណ៍ប្រើប្រាស់របស់ខ្លួនទៅជា USB-C វិញ ក្នុងនោះផងដែរក្រុមហ៊ុន Apple ក៏បានយល់ព្រមជាមួយនឹងសំណើរមួយនេះ ហើយគេរំពឹងថា Apple បំពាក់វានៅលើ iPhone 15 ដែលនឹងចេញនៅឆ្នាំក្រោយថែមទៀតផង។
លើសពីនេះទៅទៀត មានដំណឹងបែកធ្លាយថ្មីមួយទៀតតាមរយៈលោក Ming-Chi Kuo បានឱ្យដឹងថា iPhone 15 អាចនឹងបំពាក់ USB-C ជំនួសឱ្យ Lightning ហើយសម្រាប់ល្បឿននៃការបញ្ជូនទិន្នន័យវិញគឺលឿនជាងមុនទៀតប៉ុន្តែសម្រាប់តែម៉ូឌែល Pro ប៉ុណ្ណោះចំពោះ iPhone 15 ធម្មតាគឺអាចនឹងរក្សាការប្រើប្រាស់ជាមួយនឹងល្បឿន USB 2.0ដដែល។
នៅលើបណ្តាញសង្គម Twitter លោក Ming-Chi Kuo បានបន្ថែមថា ចំពោះម៉ូឌែល iPhone 15 Pro ឡើងទៅគឺអាចនឹងគាំទ្រជាមួយនឹងការប្រើប្រាស់ USB 3.2 ឬក៏ Thunderbolt 3 ជាដើម ដូច្នេះសម្រាប់ម៉ូឌែល iPhone 15 Pro ឡើងទៅគឺអាចបញ្ជូនទិន្នន័យជាវីដេអូ ឬហ្វាល់ផ្សេងៗទៀតបានលឿនជាងមុន។
(4/7)
— 郭明錤 (Ming-Chi Kuo) (@mingchikuo) November 17, 2022
2H23 new high-end iPhones' wired transfer speed will likely improve markedly, benefiting the growth of the high-speed transfer IC design industry. Apple's existing suppliers (e.g., Parade, Asmedia, Genesys Logic, Renesas, etc.) are expected to be leading beneficiaries.
ក្នុងនោះផងដែរសម្រាប់ល្បឿនបញ្ជូនទិន្នន័យធម្មតាចំពោះ USB 2.0 គឺត្រឹមតែ 480Mb/s ដោយឡែកសម្រាប់ USB 3.2 វិញគឺមានល្បឿនបញ្ជូនទិន្នន័យ 20GB/s និងប្រភេទ Thunderbolt 3 មានល្បឿនបញ្ជូនទិន្នន័យ 40Gb/s។ ដូចន្នេះសម្រាប់ល្បឿននៃការបញ្ជូនទិន្នន័យរវាង iPhone 15 ធម្មតាជាមួយនឹង iPhone 15 Pro Model គឺអាចនឹងមានលក្ខណៈខុសគ្នា។
អត្ថបទដោយ៖ រិន មករា