ក្រុមហ៊ុន Ford Motor Co និង ក្រុមហ៊ុន Hyundai Motor Co បានដាក់គោលដៅទិញមួយ ដោយបានចេញប្រតិបត្តិការវាយលុកទីផ្សាររថយន្តអគ្គិសនីប៉ែកខាងអាស៊ី ។ ដោយឡែកថ្មីៗនេះដែរ ក្រុមហ៊ុនទាំង២នេះកំពុងមានគម្រោងបុកគ្រឹះសង់រោងចក្រផលិតអាគុយរថយន្តអគ្គិសនីនៅប្រទេសឥណ្ឌូនេស៊ី។ នេះបើយោងតាមការចេញផ្សាយពី REUTERS ។
យោងតាមប្រភពដដែលបានឲ្យដឹងថា រដ្ឋមន្ត្រីសម្របសម្រួលឥណ្ឌូណេស៊ីទទួលបន្ទុកកិច្ចការសេដ្ឋកិច្ច លោក Airlangga Hartarto បានប្រាប់ទស្សនិកជននៅទីក្រុង Washington កាលពីថ្ងៃព្រហស្បតិ៍ថា ៖ Ford និង Hyundai បានសហការគ្នា ជាមួយរដ្ឋាភិបាលឥណ្ឌូនេស៊ី ដើម្បីសាងសង់រោងចក្ររុករករ៉ែ នីកែល (nickel) ដែលសមាសធាតុសំខាន់បំផុតក្នុងការផលិតអាគុយរថយន្តអគ្គិសនី ។
លោក Hartarto ក៏បានបញ្ជាក់ទៀតថា ឥណ្ឌូនេស៊ីកំពុងតែពិភាក្សាគ្នាជាមួយនឹងក្រុមហ៊ុន Hyundai និងក្រុមហ៊ុនរបស់កូរ៉េខាងត្បូងមួយទៀត LG Energy Solution លើការវិនិយោគផលិតអាគុយ និងរថយន្តអគ្គិសនី ។
គួរជម្រាបផងដែរថា ប្រទេសឥណ្ឌូនេស៊ី គឺជាប្រទេសមានស័ក្តានុពលមួយ ក្នុងការផ្គត់ផ្គង់រ៉ែ នីកែល និងគ្រឿងអេឡិចត្រូនិកដូចជា កង់ដង់ Semiconductor ឈានមុខគេមួយនៅលើទីផ្សារអន្តរជាតិ ៕
អត្ថបទដោយ៖ ព្រឹម ភក្តី
