មិនដូចជាការប្រៀងទុកដូចមុនទេ ប្លង់គំរូថ្មីដែលចេញពីការសិក្សាគម្រោងសាងសង់ផ្លូវល្បឿនលឿនភ្នំពេញ-សៀបរាម ដែលបានបង្ហាញនៅក្នុងកិច្ចប្រជុំរវាងក្រុមហ៊ុនស្ពាន និងថ្នល់ចិន (CRBC) និងរដ្ឋបាលខេត្ដកំពង់ចាមស្ដីពីការផ្ដល់ព័ត៌មានបច្ចេកទេសគម្រោងផ្លូវ។ចំពោះកិច្ចប្រជុំនេះ ត្រូវបានធ្វើឡើងនៅព្រឹកថ្ងៃទី២៥ ខែមេសា ឆ្នាំ២០២៣ និងមានការអញ្ជើញចូលរួមពីឯកឧត្តម ហេង វណ្ណនី អភិបាលរងខេត្ត តំណាងឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នាយករដ្ឋបាលសាលាខេត្ត មន្ទីរ-អង្គភាពជំនាញ មន្ត្រីពាក់ព័ន្ធ និងតំណាងក្រុមហ៊ុនសាងសង់ សាជីវកម្មស្ពាន និងថ្នល់ចិន(CRBC)ផងដែរ។
យោងតាមប្លង់គំរូដែលដាក់បង្ហាញខាងលើបានឲ្យដឹងថា គម្រោងផ្លូវល្បឿនលឿនថ្មីនេះនឹងត្រូវឆ្លងកាត់រាជធានីភ្នំពេញ ខេត្ដកណ្ដាល ខេត្ដកំពង់ចាម ខេត្ដកំពង់ធំ និងខេត្ដសៀមរាប ។ ជាក់ស្ដែងកាលពីពេលថ្មីៗនេះ ក្រសួងសាធារណការ និងការដឹកជញ្ជូន បានចេញលិខិតជម្រាបជូនដើម្បីស្នើសុំឲ្យអភិបាលនៃគណៈភិបាលរាជធានី-ខេត្ដទាំង ៥ ជួយសម្របសម្រួលដល់ដំណើរការសិក្សារបស់ក្រុមហ៊ុន CRBC លើគម្រោងសិក្សាផ្លូវល្បឿនលឿនភ្នំពេញ-សៀមរាបនេះ។
ផ្ទុយទៅវិញ សម្រាប់ប្លង់គំរូថ្មីនេះ គឺខុសគ្នានឹងប្លង់គំរូចាស់ ដែលក្រសួងសាធារណការ និងដឹកជញ្ជូនបានបង្ហាញកាលពីខែមីនា ដែលលក្ខណ:ប្លង់គំរូនោះបង្ហាញឲ្យឃើញថា ផ្លូវល្បឿនលឿន ភ្នំពេញ សៀមរាប ធ្វើឡើងកាត់ទន្លេសាប បុកត្រង់ទៅខេត្តសៀមរាបតែម្តង។
គួរបញ្ជាក់ផងដែរថា សម្រាប់គម្រោងផ្លូវល្បឿនលឿនភ្នំពេញ-ខេត្ដសៀមរាបនេះ គឺជាគម្រោងផ្លូវល្បឿនលឿនទី៣ ហើយនៅក្នុងប្រទេសកម្ពុជា បន្ទាប់ពីគម្រោងផ្លូវល្បឿនលឿនទី១ ភ្នំពេញ-ក្រុងព្រះសីហនុ បានបើកដំណើរការកាលពីចុងឆ្នាំ២០២២ កន្លងទៅ និងសម្រាប់គម្រោងផ្លូវល្បឿនលឿនទី២ ភ្នំពេញ-ក្រុងបាវិត ក៏ត្រៀមបើកការដ្ឋានសាងសង់នៅថ្ងៃទី៧ ខែមិថុនា ខាងមុខនេះដែរ៕
អត្ថបទដោយ៖ ព្រឹម ភក្តី
