យោងតាមសម្តីរបស់ឯកឧត្តមទេសរដ្ឋមន្ត្រី ស៊ុន ចាន់ថុល ក្នុងកម្មវិធីផ្សាយផ្ទាល់នៅថ្ងៃទី២៧ ខែឧសភា ឆ្នាំ ២០២២ បានបង្ហើបអំពីព័ត៌មាន ដែលក្រសួងសាធារណការ និងដឹកជញ្ជូនកំពុងតែសាងសង់នូវ ស្ថានីយសាកថ្មយានយន្តអគ្គិសនីខ្នាតធំ នៅទីស្តីការក្រសួងសាធារណការ និងដឹកជញ្ជូនផ្ទាល់ ដោយអនុញ្ញាតឲ្យឡានសាកថ្មក្នុងពេលជាមួយគ្នា បានរហូតដល់ ១២ គ្រឿង ។
ជាមួយគ្នានេះផងដែរ ឯកឧត្តមបានបន្តទៀតថា បច្ចុប្បន្ននេះក្រសួងទទួលបានជំនួយពីអង្គការ UNDP នូវម៉ាស៊ីនសាកថ្មល្បឿនលឿនចំនួន ៣ គ្រឿង និងថ្ងៃខាងមុខក្រសួងនឹងទិញថែមចំនួន ៣ គ្រឿងទៀតដើម្បីឲ្យគ្រប់ស្តង់ដារបស់ ស្ថានីយសាកថ្មខ្នាតធំ នេះ ។ លើសពីនេះ លោកក៏បន្ថែមទៀតថា ចំពោះស្ថានីយនេះ មានតែបន្ទះសូឡា ប្រក់ជាដំបូលទៀតផង ដើម្បីទាញប្រយោជន៍ពីពន្លឺព្រះអាទិត្យ ក្នុងការបំលែងទៅជាពិភពថាមពលអគ្គិសនី ហើយស្ថានីយនេះផងដែរ នឹងត្រូវបញ្ចាប់នៃការសាងសង់នៅក្នុងខែ ៦ ខាងមុខនេះ ។
ក្នុងឱកាសនោះផងដែរ ឯកឧត្តមទេសរដ្ឋមន្ត្រីក៏បានឆ្លើយនឹងសំណួរមួយដែលត្រូវបានសួរដោយទស្សនិកជនខមិន “ តើពេលណាទើបកម្ពុជានឹងមានកន្លែងសាករថយន្តអគ្គិសនីច្រើនកន្លែង ដូចស្ថានីយប្រេងឥន្ធនៈដែរ? និងសំណូមពរកុំលក់ឡានអគ្គិសនីថ្លៃពេក ?
ពេលនោះឯកឧត្តមទេសរដ្ឋមន្ត្រីក៏បានឆ្លើយថា ៖ បច្ចុប្បន្ននេះ ក្រសួងសាធារណការ និងដឹកជញ្ជូន កំពុងតែសហការជាមួយអង្គការUNDPដើម្បីរៀបចំផែនទីចង្អុលផ្លូវមួយជាក់លាក់ សំដៅអភិវឌ្ឍហេដ្ឋា រចនាសម្ព័ន្ធបញ្ចូលថាមពលអគ្គិសនីសម្រាប់យានយន្តដោយកំណត់យុទ្ធសាស្ត្ររយៈពេលខ្លី មធ្យម និងវែងក្នុងការដំឡើងស្ថានីយបញ្ចូលថាមពលអគ្គិសនីតាមទីតាំងសក្តានុពលនៅកម្ពុជា។ ឆ្លើយតបទៅនឹង សំណូមពរ៖ តម្លៃរថយន្តអគ្គិសនីមានប្រែប្រួលទៅតាមក្រុមហ៊ុនផលិត និងស្តង់ដារគុណភាពរបស់ រថយន្ត ៕
