នេះជារថយន្តអគ្គិសនីសូឡាកង់បីឈ្មោះថា Gamma របស់យីហោថ្មីមួយ Aptera ដែលទើបតែបង្កើតថ្មីនៅក្នុងរដ្ឋកាលីហ្វ័រញ៉ាហើយក៏ជារថយន្តអនាគតចេញមកប្រកួតប្រជែងជាមួយ Tesla ផងដែរ ដោយហេតុសម្អាងថា ខ្លួនអាចប្រើបច្ចេកវិទ្យាថ្មីធ្វើឲ្យរថយន្តរត់បានចម្ងាយឆ្ងាយបំផុតដល់ 1600Km លើការសាកថ្មម្តង ថែមទាំងមានតម្លៃតិចជាងពាក់កណ្តាលនៃរថយន្តអគ្គិសនីរបស់ Tesla នីមួយៗទៀតផង ។
បើយោងតាមការចេញផ្សាយកាលពីពេលថ្មីៗនេះ របស់ Futurism បានឲ្យដឹងថា ក្រុមហ៊ុន Aptera បានប្រាប់មកថា “Gamma អាចនឹងមានតម្លៃក្រោម ២ម៉ឺនដុល្លារតែប៉ុណ្ណោះ” ។ ប្រសិនជាការពិតមែននោះ តម្លៃកញ្ចប់ថ្មរបស់ Tesla(២២០០០ដុល្លារ) អាចទិញបានរថយន្តនេះមួយគ្រឿងហើយមនៅសល់លុយថែមទៀតផង។
ប្រភពដដែលបានបន្តទៀតថា គិតមកដល់ពេលនេះ ចំនួនអ្នកដែលបានកក់រថយន្តអគ្គិសនីសូឡា Gamma មានចំនួន ២៧០០០ គ្រឿងរួចទៅហើយ ខណ:ដែលក្រុមហ៊ុននេះគម្រោងនឹងផលិត Gamma នៅបំណាច់ឆ្នាំនេះ ក្រោយពេលខ្លួន កៀងគរអ្នកវិនិយោគ ប្រមូលទុនបានរហូតដល់ ៤០លានដុល្លារ។
ទន្ទឹមនឹងនេះផងដែរ យោងតាមលោក Chris Anthony ជានាយកប្រតិបត្តិ Aptera បានឲ្យដឹងថា ពួកយើងទើបតែបានរកឃើញថា រថយន្តប្រភេទ Sedan ឬ SUV ចាំបាច់ណាស់ត្រូវចំណាយថាមពលប្រមាណ ៦០% ទៅលើការទម្លុះខ្យល់នៅពេលបើកលើផ្លូវ” ដូច្នេះខាងក្រុមហ៊ុនគាត់បានសិក្សាយ៉ាងសំខាន់លើ Aerodynamics ដើម្បីឲ្យអនុញ្ញាតឲ្យ Gamma អាចពុះជ្រែកភាគល្អិតខ្យល់ បានល្អជាងរថយន្តអគ្គិសនីទូទៅ ។
ម្យ៉ាងវិញទៀត លោក Anthony ក៏បាននិយាយបន្តទៀតថា បន្ទះស្រូបពន្លឺព្រះអាទិត្យនៅលើដំបូលរបស់ Gamma អាចបន្ថែមផ្តល់នូវថាមពលរត់បាន ៦៤គ.ម ក្នុងមួយថ្ងៃថែមទៀតផង ។
ដូច្នេះបើគិតលើចម្ងាយផ្លូវពីភ្នំពេញទៅសៀមរាប មានប្រវែងខ្ទង់ ៣០០គ.ម ដូច្នេះបើយើងធ្វើដំណើរដោយរថយន្តអគ្គិសនីសូឡា Gamma យើងអាចជិះបាន ៥ ជើងឯណោះ ៕
អត្ថបទដោយ៖ ព្រឹម ភក្តី
