Elon Musk ក្តៅស្លឹកត្រចៀក បើ Twitter ដកចេញពី App Store គាត់នឹងទៅបង្កើតទូរស័ព្ទថ្មី
Makara Rin
NOVEMBER 27 2022
អាជីវកម្ម 4.0
839 views
2 mins read

ចាប់តាំងពីពេលមហាសេដ្ឋីលេខមួយលើលោក Elon Musk រូបនេះបានឡើងកាន់កាប់ក្រុមហ៊ុន Twitter មកឃើញថា​មានរឿងរ៉ាវជាច្រើនដែលបានកើតឡើងពោលគឺគាត់បានកែប្រែគោលការណ៍ទៅលើផ្នែកមួយចំនួ​នរបស់ Twitter រួមទាំងមានការបញ្ឈប់បុគ្គលិកផងដែរ។ ដោយឡែកថ្មីៗនេះក៏លេចឮដំណឹងមួយទៀតថាលោកចង់បង្កើតទូរស័ព្ទខ្លួនឯង បើពិតមែនតើវាអាចជា Tesla Phone ដែរទេ?

ដោយយោងទៅតាមការចុះផ្សាយរបស់ Gizmodo បានឱ្យដឹងថា​ ទាក់ទងជាមួយនឹងរឿងដែលកំពុងល្បីនេះគឺកើតចេញមកពីការឆ្លើយឆ្លងសារគ្នានៅលើ Twitter រវាងគណនី Twitter មួយឈ្មោះ Liz Wheeler ជាមួយនឹងលោក Elon Musk ដោយ Liz បានសរសេរស្ទង់មតិថា​ “បើ Apple និង Google ដក Twitter ចេញពី Store របស់គេ Elon គួរតែបង្កើតស្មាតហ្វូនដោយខ្លួនឯង ហើយមនុស្សនឹងឈប់ប្រើ iPhone និង Android ហើយ...”។

យ៉ាងណាមិញលោក Elon Musk ក៏បានធ្វើការតបវិញថា គាត់មិនសង្ឃឹមថាវាអាចនឹងមានរឿងនោះកើតឡើងទេប៉ុន្តែ ប្រសិនបើវាមិនមានជម្រើស​ផ្សេងទេ លោកនឹងទៅបង្កើតស្មាតហ្វូនផ្សេងទៀតដោយខ្លួនឯង។ “I certainly hope it does not come to that, but, yes, if there is no other choice, I will make an alternative phone,” ។

ជុំវិញបញ្ហានេះខាង Apple និង Google ជាដើមគឺមានគោលការណ៍រៀងៗខ្លួនដែលអាចបិទឬច្រានចោលកម្មវិធីណាមួយចេញពី Store ក៏បានដែរ ប្រសិនបើកម្មវិធីទាំងនោះមិនគោរពទៅតាមគោលការណ៍ដូចជា​ ការបង្ហាញពាក្យរើសអើង ការបៀតបៀន គំរាមកំហែង អាសអាភា​ស ជាដើម។

ជាក់ស្តែងកាលពីឆ្នាំ2021កន្លងទៅ Apple ក៏ធ្លាប់បានដកបណ្តាញសង្គមមួយឈ្មោះ Parler ចេញពី  App Store ដោយមិនបានបំពេញគោលការណ៍ត្រូវនឹងអ្វីដែលគេចង់បានហើយក្រោយមកក៏ Apple អនុញ្ញាតឱ្យដាក់ចូល App Store វិញបន្ទាប់ពីមានការកែរប្រែ។

ចំពោះអ្នកទាំងអស់គ្នាវិញយល់យ៉ាងណាដែរ​​ ប្រសិនរឿងនោះកើតឡើងមែន​ គិតថា​ Elon Musk នឹងទៅបង្កើតស្មាតហ្វូនដែលគេល្បីជាយូរមកហើយឈ្មោះថា Tesla Phone ដែរទេ?​

អត្ថបទដោយ៖ រិន មករា

បន្តអានអត្ថបទបន្ទាប់
ស្វែងយល់អំពីពួកយើង
ទំនាក់ទំនង​មក​ពួក​យើង
© 2024 Baksey Media. All Rights Reserved.
Developed by: Technology Camabodia Team